இந்திய சாலைகளில் சோதனை செய்யப்பட்டு வரும் 'டாடா கர்வ்' எஸ்யூவி, என்ன எதிர்பார்க்கலாம்?
செய்தி முன்னோட்டம்
இந்தியாவில் தங்களுடைய புதிய எஸ்யூவி மாடலான 'கர்வ்'வை (Curvv) அடுத்த ஆண்டு அறிமுகப்படுத்தத் திட்டமிட்டு வருகிறது டாடா மோட்டார்ஸ்.
கடந்த சில மாதங்களில் கர்வ் மாடலின் சோதனை ஓட்டத்தை இந்தியாவில் அதிகரித்திருக்கிறது அந்நிறுவனம். சரி, என்னென்ன வசதிகளுடன் உருவாகி வருகிறது டாடா கர்வ்?
ஹூண்டாய் க்ரெட்டா, கியா செல்டோஸ் மற்றும் எம்ஜி அஸ்டர் ஆகிய மாடல்களுக்குப் போட்டியாக இந்தியாவில் அறிமுகப்படுத்தப்படவிருக்கும் எரிபொருள் கர்வ் மாடலுக்கு முன்பாகவே, எலெக்ட்ரிக் கர்வ் மாடலை வெளியிடவும் அந்நிறுவனம் திட்டமிட்டு வருகிறது.
பல்வேறு வசதிகளுடன் வெளியாகவிருக்கும் கர்வ் மாடலின், கான்செப்டை இந்த ஆண்டு டெல்லியில் நடைபெற்ற 2023 ஆட்டோ எக்ஸ்போவின் டாடா காட்சிப்படுத்தியிருந்தது குறிப்பிடத்தக்கது.
டாடா
டாடா கர்வ்: வசதிகள்
பெரும்பாலான C பிரிவு எஸ்யூவிக்கள் பனோரமிக் சன்ரூஃப் வசதியுடனேயே அறிமுகப்படுத்தப்படுவதால், புதிய கர்வ் எஸ்யூவியும் பனோரமிக் சன்ரூஃப் வசதியைக் கொண்டிருக்கும் என எதிர்பார்க்கப்படுகிறது.
முழுமையான எல்இடி விளக்குகள், வெண்டிலேட்டட் சீட்கள், ரியர் ஏசி வெண்ட், பவர்டு டிரைவர் சீட், தானியங்கி முகப்பு விளக்கு மற்றும் தானியங்கி வைப்பர்களைப் பெறவிருக்கிறது டாடா கர்வ்.
கடந்த மாதம் இந்தியாவில் விற்பனை செய்யப்பட்டு வந்த தங்களது சஃபாரி மற்றும் ஹேரியர் எஸ்யூவி மாடல்களின் ஃபேஸ்லிப்ட் வெர்ஷன்களை அறிமுகப்படுத்தியிருந்தது டாடா. அந்த மாடல்களில் வழங்கப்பட்ட ADAS பாதுகாப்பு வசதிகளை புதிய கர்வ் மாடலிலும் டாடா கொடுக்கலாம் என எதிர்பார்க்கப்படுகிறது.
எஸ்யூவி
டாடா கர்வ்: இன்ஜின் மற்றும் எலெக்ட்ரிக் மோட்டார்
டாடா கர்வ்வின் எலெக்ட்ரிக் வெர்ஷனில் ஜென்2 எலெக்ட்ரிக் பவர்ட்ரெயின் செட்டப் மற்றும் 450 கிமீ ரேஞ்சைக் கொடுக்கக்கூடிய வகையிலான பேட்டரியை டாடா வழங்கலாம் என எதிர்பார்க்கப்படுகிறது.
மேலும், எலெக்ட்ரிக் கர்வ் மாடலின் ஆல் வீல் டிரைவ் வசதியும் டாடா கொடுப்பதற்கான வாய்ப்புகள் சற்று அதிகமாகவே இருக்கின்றன.
கர்வ்வின் எரிபொருள் வெர்ஷனில், 125hp பவர் மற்றும் 225Nm டார்க்கை வெளிப்படுத்தக்கூடிய 1.2 லிட்டர் டர்போ பெட்ரோல் இன்ஜினைக் கொடுக்கத் திட்டமிட்டிருக்கிறது டாடா. மேலும், இந்த இன்ஜினுடன் 6 ஸ்பீடு மேனுவல் மற்றும் 6 ஸ்பீடு DCT ஆட்டோமேட்டிக் கியர்பாக்ஸ் தேர்வுகள் கொடுக்கப்படலாம் என எதிர்பார்க்கப்படுகிறது.