சந்தையைக் கலக்கும் ராயல் என்ஃபீல்டு! ஜூலை மாத விற்பனை 34% உயர்ந்து 1.18 லட்சம் யூனிட்களைக் கடந்தது

எழுதியவர் Sekar Chinnappan

Aug 01, 2026

05:44 pm

செய்தி முன்னோட்டம்

ராயல் என்ஃபீல்டு நிறுவனம் கடந்த ஜூலை 2026 மாதத்தில் தனது ஒட்டுமொத்த மோட்டார் சைக்கிள் விற்பனையில் ஆண்டிற்கு 34 சதவீதம் வரை சிறப்பான வளர்ச்சியைப் பதிவு செய்துள்ளது. இக்காலகட்டத்தில் அந்நிறுவனம் உலகளவில் மொத்தம் 1,18,232 பைக்குகளை விற்பனை செய்து சாதனை படைத்துள்ளது. குறிப்பாக இந்திய உள்நாட்டுச் சந்தையில் ராயல் என்ஃபீல்ட் பைக்குகளுக்கான தேவை கணிசமாக அதிகரித்ததே இந்த அதிரடி விற்பனை உயர்விற்குப் பிரதானக் காரணமாக அமைந்தது. அதேவேளையில், வெளிநாடுகளுக்கான ஏற்றுமதிப் பிரிவிலும் நிறுவனம் சீரான மற்றும் மிதமான வளர்ச்சியைக் கண்டுள்ளது குறிப்பிடத்தக்கது.

விற்பனை

உள்நாட்டு விற்பனை மற்றும் ஏற்றுமதி விவரங்கள்

கடந்த ஆண்டு ஜூலை மாதத்தில் 76,254 பைக்குகள் மட்டுமே உள்நாட்டில் விற்பனையாகி இருந்த நிலையில், நடப்பு ஜூலை மாதத்தில் 1,05,317 பைக்குகள் விற்பனையாகி 38 சதவீத உயர்வைக் கண்டுள்ளன.

அதேபோல வெளிநாடுகளுக்கான ஏற்றுமதி கடந்த ஆண்டின் 11,791 யூனிட்டுகளில் இருந்து தற்போது 12,915 யூனிட்டுகளாக அதிகரித்து 10 சதவீத வளர்ச்சியைப் பதிவு செய்துள்ளது.

மேலும் நடப்பு நிதியாண்டின் ஏப்ரல் முதல் ஜூலை வரையிலான காலகட்டத்தில், நிறுவனம் மொத்தம் 4,48,659 பைக்குகளை விற்பனை செய்து ஒட்டுமொத்தமாக 27 சதவீத விற்பனை வளர்ச்சியைப் பெற்றுள்ளது என்பது குறிப்பிடத்தக்க செய்தி ஆகும்.

எலக்ட்ரிக் பைக்

எலக்ட்ரிக் பைக்கின் வளர்ச்சி மற்றும் கிளாசிக் 350 மாற்றம்

விற்பனை உயர்வுடன் ராயல் என்ஃபீல்டின் புதிய ஃப்ளையிங் ஃபீலி (Flying Flea) மின்சார வாகனப் பிரிவு பெங்களூரு நகரில் தனது விற்பனை மையங்களை வேகமாக விரிவாக்கம் செய்து வருகிறது.

ஜெயநகரில் தொடங்கப்பட்ட முதல் ஷோரூமைத் தொடர்ந்து, அங்கு மேலும் 10 புதிய விற்பனை மற்றும் சேவை மையங்கள் திறக்கப்பட்டுள்ளன.

அத்துடன் தனது புகழ்பெற்ற 2026 கிளாசிக் 350 பைக்கில் அசிஸ்ட் அண்ட் ஸ்லிப்பர் கிளட்ச் மற்றும் யுஎஸ்பி டைப்-சி ஃபாஸ்ட் சார்ஜிங் போர்ட் போன்ற புதிய பயன்பாட்டு வசதிகளை நிறுவனம் அறிமுகம் செய்து வாடிக்கையாளர்களுக்கு சலுகை அளித்துள்ளது.

ஆந்திரா

ஆந்திராவில் பிரம்மாண்டமான புதிய உற்பத்தி ஆலை

எதிர்காலத் தேவை மற்றும் உற்பத்தியை அதிகரிக்கும் பொருட்டு, ஆந்திரப் பிரதேச மாநிலத்தில் ரூ.1,225 கோடி முதலீட்டில் புதிய கிரீன்ஃபீல்டு ஆலையை அமைக்கும் முதற்கட்டப் பணிகளை ராயல் என்ஃபீல்டு நிறுவனம் தீவிரமாக முன்னெடுத்து வருகிறது.

இந்த அதிநவீன உற்பத்தி ஆலை முழுமையாக செயல்பாட்டிற்கு வரும் போது, ஆண்டுக்குக் கூடுதலாக 4.5 லட்சம் மோட்டார் சைக்கிள்களை உற்பத்தி செய்யும் பிரம்மாண்ட திறன் உருவாகும்.

வரும் 2029-30 நிதியாண்டுக்குள் இப்புதிய தொழிற்சாலையின் கட்டுமானப் பணிகள் அனைத்தும் முழுமையாக நிறைவடையும் என எதிர்பார்க்கப்படுகிறது.

இது நிறுவனத்தின் சர்வதேச வர்த்தக விரிவாக்கம் மற்றும் வருங்கால வளர்ச்சிக்கு மிகப்பெரிய அடித்தளமாக அமையும்.