ரூ.2 லட்சம் வரை தள்ளுபடியுடன் விற்பனை செய்யப்படும் மாருதி சுஸூகி ஜிம்னி
மஹிந்திரா தார் ஆஃப்ரோடு எஸ்யூவிக்குப் போட்டியாக இந்தியாவில் வெளியிட்ட தங்களுடைய ஜிம்னி மாடலின் இந்திய விற்பனையை உயர்த்தும் பொருட்டு பல்வேறு நடவடிக்கைகளை எடுத்து வருகிறது இந்திய முன்னணி கார் தயாரிப்பாளரான மாருதி சுஸூகி. அதன்படி, தீபாவளி பண்டிகையொட்டி ஜிம்னி மாடலின் அடிப்படை வேரியன்டான ஸெட்டா மேனுவல் டிரான்ஸ்மிஷனுக்கு ரூ.1 லட்சம் வரை தள்ளுபடி அறிவித்திருந்தது மாருதி. ஆனால் இப்போதோ, குறிப்பிட்ட காலத்திற்கு மட்டும் கூடுதலாக ரூ.1 லட்சம் தள்ளுபடியுடன் சேர்த்து ரூ.12.74 லட்சத்திற்கு பதிலாக, ரூ.10.74 லட்சம் எக்ஸ்-ஷோரூம் விலையில் புதிய ஜிம்னியை நாம் வாங்க முடியும். ஜிம்னியின் இந்த விலையானது தொடக்க நிலை மேனுவல் டிரான்ஸ்மிஷன் கொண்ட 4 வீல் டிரைவ் மஹிந்திரா தாரை விட ரூ.4 லட்சம் குறைவு.
மாருதி சுஸூகி ஜிம்னி தண்டர் எடிஷன்:
தள்ளுபடி விலை மட்டுமல்லாது, புதிய தண்டர் எடிஷன் ஜிம்னி ஒன்றையும் அறிமுகப்படுத்தியிருக்கிறது மாருதி சுஸூகி. புதிதாக வாங்கும் ஜிம்னி மாடலுடன் தண்டர் எடிஷன் பேக்கேஜை கூடுதல் விலையில் வாடிக்கையாளர்கள் பெற்றுக் கொள்ளலாம். மேனுவல் மற்றும் ஆட்டமேட்டிக் வேரியன்ட்களுக்காக தனித்தனி தண்டர் எடிஷன் பேக்கேஜூகளை வெளியிட்டிருக்கிறது மாருதி சுஸூகி. இந்த பேக்கேஜில் காஸ்மெடிக் மாற்றங்கள் மட்டுமே முழுவதுமாக இடம்பெற்றிருக்கின்றன. மெக்கானிக்கலாக எந்த மாற்றமும் ஜிம்னி தண்டர் எடிஷனில் செய்யப்படவில்லை.105hp பவரை வெளிப்படுத்தக்கூடிய 1.5 லிட்டர் பெட்ரோல் இன்ஜினே அனைத்து ஜிம்னியிலும் பயன்படுத்தப்படவிருக்கிறது. அனைத்து வேரியன்டகளிலும் ஆல் வீல் டிரைவ் அடிப்படையாகவே கொடுக்கப்பட்டிருக்கும் நிலையில், 5-ஸ்பீடு மேனுவல் மற்றும் 4-ஸ்பீடு ஆட்டோமேட்டிக் கியர்பாக்ஸ் தேர்வுகளுடன் கிடைக்கிறது ஜிம்னி.
