இந்தியாவில் செல்டோஸ் மற்றும் கேரன்ஸின் விலையை உயர்த்தும் கியா
செய்தி முன்னோட்டம்
இந்தியாவில் விற்பனையாகி வரும் தங்களுடைய செல்டோஸ் எஸ்யூவி மற்றும் கேரன்ஸ் எம்பிவி மாடல்களின் விலையை உயர்த்தியிருப்பதாக அறிவிப்பு வெளியிட்டிருக்கிறது தென்கொரியாவைச் சேர்ந்த கார் தயாரிப்பு நிறுவனமான கியா.
இந்தியாவில் செல்டோஸ், கேரன்ஸ், சொனெட், கார்னிவல் மற்றும் EV6 என ஐந்து கார் மாடல்களை விற்பனை செய்து வருகிறது கியா நிறுவனம். இந்நிலையில், செல்டோஸ் மற்றும் கேரன்ஸ் ஆகிய இரண்டு கார் மாடல்களின் விலையை மட்டும் 2% வரை உயர்த்தியிருப்பதாக அறிவித்திருக்கிறது கியா.
இந்த விலை உயர்வானது வரும் அக்டோபர் 1ம் தேதி முதல் அமலுக்கு வரும் எனவும் குறிப்பிட்டிருக்கிறது அந்நிறுவனம். இந்த ஆண்டு ஏப்ரல் மாதமும், செல்டோஸ் மற்றும் கேரன்ஸின் விலைகளை கியா உயர்த்தியது குறிப்பிடத்தக்கது.
கியா
ஏன் விலையை உயர்த்துகிறது கியா?
மூலப் பொருட்களின் விலை தொடர்ந்து உயர்ந்து வந்த போதிலும், முடிந்தளவிற்கு விலையை உயர்த்தாமல் கட்டுக்குள் வைத்திருந்ததாகவும், தற்போது விலையை உயர்த்துவது தான் ஒரே வழி எனவும் தங்களுடைய அறிவிப்பில் குறிப்பிட்டிருக்கிறது கியா நிறுவனம்.
தங்களது மற்ற மூன்று மாடல்களின் விலைகளில் எந்த மாற்றமும் இல்லை என்பதையும் குறிப்பிட்டிருக்கிறது கியா.
கடந்த ஜூலை மாதம் செல்டோஸ் மாடலின் ஃபேஸ்லிஃப்ட் வெர்ஷனை இந்தியாவில் அறிமுகப்படுத்தியது அந்நிறுவனம். அறிமுகத்தைத் தொடர்ந்து இரண்டே மாதங்களில் 50,000 முன்பதிவை பெற்றிருக்கிறது செல்டோஸ்.
மேலும், செல்டோஸின் காத்திருப்புக் காலத்தைக் குறைக்க GTX+ (S) மற்றும் X-Line (S) என இரண்டு புதிய செல்டோஸ் வேரியன்ட்களை அறிமுகப்படுத்தியிருக்கிறது கியா. தற்போது ரூ.10.89 லட்சம்-ரூ.20 லட்சம் வரையான விலையில் இந்தியாவில் விற்பனையாகி வருகிறது செல்டோஸ்.