2024ல் EV9 எலெக்ட்ரிக் காரை இந்தியாவில் வெளியிடவிருக்கும் கியா
செய்தி முன்னோட்டம்
2024ம் ஆண்டிற்குள் இந்தியாவில் தங்களுடைய EV9 எலெக்ட்ரிக் எஸ்யூவியை அறிமுகப்படுத்தத் திட்டமிட்டிருக்கிறது தென் கொரியாவைச் சேர்ந்த கார் தயாரிப்பு நிறுவனமான கியா.
கடந்த ஆண்டு இந்தியாவில் தங்களுடைய முதல் எலெக்ட்ரிக் காராக EV6 மாடலை அறிமுகப்படுத்தியிருந்தது கியா. அதனைத் தொடர்ந்து, இந்தியாவில் தங்களுடைய இரண்டாவது எலெக்ட்ரிக் கார் மாடலாக EV9 வெளியிடவிருக்கிறது அந்நிறுவனம்.
மேலும், இந்தியாவின் எலெக்ட்ரிக் வாகன சந்தையில் மூன்று வரிசை சீட்கள் கொண்ட முதல் எலெக்ட்ரிக் வாகனமாகவும் இந்த EV9 இருக்கும் எனத் தெரிவிக்கப்பட்டுள்ளது.
தற்போது இந்திய எலெக்ட்ரிக் வாகன சந்தையில் முன்னணியில் இருக்கிறது டாடா மோட்டார்ஸ். இந்தியாவின் பயணிகள் எலெக்ட்ரிக் வாகன சந்தையி்ல 15% பங்குகளைப் பிடிக்கத் திட்டமிட்டு வருகிறது கியா.
கியா
கியா EV9:
இந்த ஆண்டு ஜனவரி மாதம் நடைபெற்ற ஆட்டோ எக்ஸ்போவில் ஒரு கான்செப்ட் காராகவே அறிமுகமானது கியா EV9. ஆனால், அதனைத் தொடர்ந்து உலகளவில் பல்வேறு சந்தைகளிலும் இந்தக் காரை வெளியிட்டது கியா.
மேலும், இந்தியாவில் இந்தக் காரை 2025ம் ஆண்டே வெளியிடத் திட்டமிட்டிருந்தது அந்நிறுவனம். தற்போது அது மாற்றியமைக்கப்பட்டு, அடுத்த ஆண்டே EV9-ஐ இந்தியாவில் வெளியிட ஆயத்தமாகி வருகிறது கியா.
ஒருமுறை சார்ஜ் செய்தால் 541 கிமீ வரை செல்லும் திறன் கொண்ட இந்த EV9 எலெக்ட்ரிக் எஸ்யூவி மாடலுடன், புதிய மேம்படுத்தப்பட்ட அடுத்த தலைமுறை கார்னிவல் MPV மாடலையும் வெளியிடத் திட்டமிட்டிருக்கிறது கியா.