ஜப்பான் மொபிலிட்டி ஷோவில் அறிமுகமானது மாருதி சுஸூகியின் 'நான்காம் தலைமுறை ஸ்விப்ட்'
செய்தி முன்னோட்டம்
அப்டேட் செய்யப்பட்ட நான்காம் தலைமுறை ஸ்விப்ட் ஹேட்ச்பேக் மாடலை ஜப்பான் மொபிலிட்டி ஷோவில் அறிமுகப்படுத்தியிருக்கிறது மாருதி சுஸூகி. மேம்படுத்தப்பட்ட டிசைனுடன், புதிய வசதிகள் பலவற்றையும் நான்காம் தலைமுறை ஸ்விப்டில் அளித்திருக்கிறது மாருதி.
வெளிப்புறம் புதிய மெஷ் பேட்டர்னுடன் கூடிய க்ரோம் கிரில், எல்இடி முகப்பு மற்றும் டெய்ல் விளக்குகள் மற்றும் ஆங்காங்கே வடிவமைப்பில் புதிய மேம்பாடுகளைச் செய்திருக்கிறது மாருதி.
வெளிப்புறம் மட்டுமின்றி ஸ்விப்டின் உட்புற வடிவமைப்பிலும் பல்வேறு மாற்றங்களை மேற்கொண்டிருக்கிறது அந்நிறுவனம்.
அதன்படி, இன்ஸ்ட்ரூமண்ட் கிளஸ்டர், ஸ்டீயரிங் வீல் மற்றும் சென்டர் கன்சோல் ஆகியவை மேம்படுத்தப்பட்டிருக்கிறது.
டேஷ்போர்டு மற்றும் ஏசி கன்சோல் ஆகியவை மறுவடிவமைப்பு செய்யப்பட்டிருக்கின்றன. மேலும், கனெக்டிவிட்டி வசதிகளுடன் கூடிய முற்றிலும் புதிய 10-இன்ச் இன்ஃபோடெயின்மென்ட் சிஸ்டத்தை ஸ்விப்டில் கொடுத்திருக்கிறது மாருதி.
மாருதி சுஸூகி
நான்காம் தலைமுறை மாருதி சுஸூகி ஸ்விப்ட்:
புதிய ஸ்விப்டில், 90hp பவர் மற்றும் 113Nm டார்க்கை வெளிப்படுத்தக்கூடிய 1.2 லிட்டர் K-சீரிஸ் இன்ஜினைக் கொடுத்திருக்கிறது மாருதி. இத்துடன் மைல்டு-ஹைபிரிட் தொழில்நுட்பமும், CNG வசதியைக் கொண்டு மேம்படுத்தும் தேர்வும் அளிக்கப்பட்டிருக்கிறது.
5 ஸ்பீடு மேனுவல் மற்றும் 5 ஸ்பீடு ஆட்டோமேட்டிக் கியர்பாக்ஸ் தேர்வுகள் கொடுக்கப்படவிருக்கும் இந்தப் புதிய ஸ்விப்டில், பாதுகாப்பிற்காக இரண்டாம் நிலை ADAS பாதுகாப்பு அம்சங்கள் கொடுக்கப்பட்டிருக்கின்றன.
புதிய ஸ்விப்ட் மாடலை 2024ம் ஆண்டு இந்தியாவில் வெளியிடத் திட்டமிட்டிருக்கிறது மாருதி. இந்தியாவிலேயே தயாரிப்பை மேற்கொள்வதோடு, இந்தியாவிலிருந்தே வெளிநாடுகளுக்கு புதிய ஸ்விப்டை ஏற்றுமதி செய்யவும் திட்டமிட்டிருக்கிறது அந்நிறுவனம்.
ஹூண்டாய் கிராண்டு i10 நியாஸ், சிட்ரன் C3 மற்றும் டாடா டியாகோ ஆகிய மாடல்களுக்குப் போட்டியாகக் களமிறக்கப்படவிருக்கிறது புதிய நான்காம் தலைமுறை ஸ்விப்ட்.