மழைநீரால் சேதமடைந்த ஜாகுவார் கார்: இழப்பீடு வழங்க நுகர்வோர் நீதிமன்றம் உத்தரவு
செய்தி முன்னோட்டம்
மழைநீரால் சேதமடைந்த சொகுசு காரின் காப்பீட்டு கோரிக்கையை நிராகரித்த இன்சூரன்ஸ் நிறுவனத்திற்கு, வாடிக்கையாளருக்கு ரூ.2.02 லட்சம் இழப்பீடு வழங்குமாறு சத்தீஸ்கர் மாவட்ட நுகர்வோர் குறைதீர் ஆணையம் உத்தரவிட்டுள்ளது. வாடிக்கையாளருக்கு தெரிவிக்கப்படாத எந்தவொரு விதிவிலக்கு விதிகளும் அவரைப் கட்டுப்படுத்தாது என்றும், அதன் அடிப்படையில் இழப்பீட்டை நிராகரித்தது சட்டப்படி தவறானது என்றும் ஆணையம் அதிரடியாகத் தீர்ப்பளித்தது. இதன் மூலம் பாதிக்கப்பட்ட கார் உரிமையாளருக்குக் காப்பீட்டுத் தொகையுடன் சேர்த்து ரூ.2.02 லட்சம் இழப்பீடு வழங்க உத்தரவிடப்பட்டுள்ளது.
பின்னணி
வழக்கின் பின்னணி
கடந்த ஆகஸ்ட் 2021-இல், ஜாகுவார் சொகுசு கார் உரிமையாளர் ஒருவர் தனது காரின் ஓட்டுநர் பக்க ஜன்னலை தற்செயலாக சிறிது திறந்து வைத்திருந்தார்.
அப்போது பெய்த மழையால் காரின் தகவல் மற்றும் பொழுதுபோக்கு அம்சம் உள்ளிட்ட சில பாகங்கள் பலத்த சேதமடைந்தன.
இதற்காக அவர் ரூ.2.73 லட்சம் செலவில் பழுதுபார்த்த நிலையில், இன்சூரன்ஸ் நிறுவனத்தின் ஆய்வாளர் ரூ.1.98 லட்சம் சேதத்தைக் கணித்தார்.
எனினும், பிப்ரவரி 4, 2022 அன்று இன்சூரன்ஸ் நிறுவனம் இந்த இழப்பீட்டுக் கோரிக்கையை முழுமையாக நிராகரித்தது.
மழைநீரால் ஏற்படும் சேதங்களுக்குக் காப்பீட்டில் விலக்கு அளிக்கப்பட்டுள்ளதாகவும், ஜன்னலைத் திறந்து வைத்தது வாடிக்கையாளரின் கவனக்குறைவு என்றும், இது ஒப்பந்த விதிகளை மீறிய செயல் என்றும் கூறி நிறுவனம் இழப்பீடு வழங்க மறுத்தது.
தீர்ப்பு
நுகர்வோர் நீதிமன்றத்தின் அதிரடித் தீர்ப்பு
இன்சூரன்ஸ் நிறுவனத்தின் முடிவால் அதிர்ச்சியடைந்த கார் உரிமையாளர், சேவை குறைபாடு மற்றும் நியாயமற்ற வர்த்தக நடைமுறையைக் சுட்டிக்காட்டி மாவட்ட நுகர்வோர் குறைதீர் ஆணையத்தில் வழக்குத் தொடர்ந்தார்.
காப்பீட்டுப் பாலிசியை வழங்கும்போது முழுமையான விதிகளையும் நிபந்தனைகளையும் நிறுவனம் தமக்கு வழங்கவில்லை என்றும் அவர் குற்றம் சாட்டினார்.
வழக்கை விசாரித்த நுகர்வோர் ஆணையம், இன்சூரன்ஸ் நிறுவனம் பாலிசி ஆவணத்தின் 4 பக்கங்களில் 3 பக்கங்களை மட்டுமே நீதிமன்றத்தில் சமர்ப்பித்ததையும், விலக்கு அளிக்கப்பட்ட விதிகளை வாடிக்கையாளருக்கு முன்கூட்டியே தெரிவிக்காததையும் சுட்டிக்காட்டியது.