பஸால்ட் மாடல் கார்களின் விலையை ₹28,000 வரை உயர்த்தியது சிட்ரோயன் இந்தியா
செய்தி முன்னோட்டம்
சிட்ரோயன் இந்தியா (Citroen India) ஆனது 2025 ஆம் ஆண்டில் அதன் கூபே எஸ்யூவி மாடலான, பஸால்ட்க்கான விலையில் மாற்றம் செய்துள்ளது. இதற்கு முன்னர் மஹிந்திரா, டாடா மோட்டார்ஸ், மாருதி சுஸூகி, ஆடி, பிஎம்டபிள்யூ மற்றும் மெர்சிடிஸ் பென்ஸ் உள்ளிட்ட பல வாகன உற்பத்தியாளர்கள் இதேபோல் தங்கள் கார்களின் விலை மாற்றங்களை அறிவித்திருந்த நிலையில், அந்த வரிசையில் தற்போதுசிட்ரோயனும் சேர்ந்துள்ளது. சிட்ரியன் பஸால்ட் காருக்கு, வேரியண்ட்டைப் பொறுத்து ₹28,000 வரை விலை அதிகரித்துள்ளது. 1.2 லிட்டர் டர்போ-பெட்ரோல் எம்டி பிளஸ் மற்றும் ஏடி பிளஸ் வகைகளுக்கு அதிகபட்ச விலை உயர்வு பொருந்தும். தொடக்க நிலை 1.2-லிட்டர் பெட்ரோல் மேனுவல் டிரான்ஸ்மிஷன் (எம்டி) வகையின் விலை இப்போது ₹26,000 அதிகமாகும்.
விலை
விலை உயர்வு விபரங்கள்
இதற்கிடையில், 1.2-லிட்டர் டர்போ-பெட்ரோல் எம்டி மேக்ஸ் மற்றும் எம்டி மேக்ஸ் டூயல்-டோன் வகைகள் ஒவ்வொன்றும் ₹21,000 விலை உயர்ந்துள்ளன. டர்போ-பெட்ரோல் ஆட்டோமேட்டிக் டிரான்ஸ்மிஷன் (ஏடி) மேக்ஸ் மற்றும் ஏடி மேக்ஸ் டூயல்-டோன் வகைகளின் விலை ₹17,000 அதிகரித்துள்ளது. இருப்பினும், அனைத்து வகைகளும் பாதிக்கப்படவில்லை. 1.2 லிட்டர் பெட்ரோல் எம்டி பிளஸ் அதன் முந்தைய விலையான ₹9.99 லட்சத்தை (எக்ஸ்-ஷோரூம்) தக்க வைத்துக் கொண்டுள்ளது. திருத்தத்திற்குப் பிறகு, பஸால்ட்டின் விலை வரம்பு ₹8.25 லட்சத்தில் தொடங்கி ₹14 லட்சம் (எக்ஸ்-ஷோரூம்) வரை செல்கிறது. ஆகஸ்ட் 2024 இல் அறிமுகப்படுத்தப்பட்ட சிட்ரோயன் பசால்ட், டாடா கர்வ்வ் உடன் இணைந்து முக்கிய கூபே எஸ்யூவி பிரிவில் போட்டியிடுகிறது.