புதிய எலெக்ட்ரிக் கார் மாடல்களின் பெயர்களை இந்தியாவில் பதிவு செய்திருக்கும் BYD
செய்தி முன்னோட்டம்
இந்தியாவில் எலெக்ட்ரிக் கார்களை விற்பனை செய்து வரும் சீன நிறுவனமான BYD, இந்தியாவில் புதிதாக இரண்டு எலெக்ட்ரிக் கார்களின் பெயர்களைப் பதிவு செய்திருக்கிறது.
இந்தாண்டு ஜனவரி மாதம் இந்தியாவில் நடைபெற்ற ஆட்டோ எக்ஸ்போவில் 'சீல்' என்ற புதிய எலெக்ட்ரிக் கார் ஒன்றை காட்சிப்படுத்தியிருந்தது BYD.
மேலும், 'e6' மற்றும் 'அட்டோ 3' ஆகிய இரண்டு எலெக்ட்ரிக் கார்களை இந்தியாவில் அந்நிறுவனம் விற்பனையும் செய்து வருகிறது.
இந்நிலையில், 'சீகல்' (Seagull) என்ற எலெக்ட்ரிக் ஹேட்ச்பேக் மாடல் ஒன்றின் பெயரையும், 'சீ லயன்' (Sea Lion) என்ற எலெக்ட்ரிக் எஸ்யூவின் மாடல் ஒன்றின் பெயரையும் தற்போது இந்தியாவில் பதிவு செய்திருக்கிறது BYD.
BYD
BYD-யின் புதிய எலெக்ட்ரிக் கார்கள்:
BYD-யின் மேற்கூறிய இரண்டு எலெக்ட்ரிக் கார் மாடல்களில், சீகல் மாடலானது ஏற்கனவே வெளிநாட்டு ஆட்டோமொபைல் சந்தைகளில் விற்பனை செய்யப்பட்டு வருகிறது.
இந்தியாவில் இந்த மாடல் அறிமுகப்படுத்தப்படும் பட்சத்தில், டாடாவின் டியாகோ EV மற்றும் சிட்ரன் eC3 ஆகிய மாடல்களுக்குப் போட்டியாகக் களமிறங்கும் என எதிர்பார்க்கப்படுகிறது.
மற்றொரு மாடலான சீ லயன் மாடலானது, வெளிநாட்டுச் சாலைகளில் தற்போது தான் சோதனை செய்யப்பட்டு வருகிறது. மிட்சைஸ் எலெக்ட்ரிக் எஸ்யூவி மாடலான இதனை, தங்களுடைய e-பிளாட்ஃபார்ம் 3.0வில் உருவாக்கியிருக்கிறது BYD.
ஒரு முறை சார்ஜ் செய்தால் அதிகபட்சமாக 700 கிமீ வரை ரேஞ்சைக் கொடுக்கக்கூடிய எலெக்ட்ரிக் கார் மாடல்களை விற்பனை செய்து வருகிறது BYD.