கார் ஓட்டும்போது கூகுள் மேப்ஸ் பயன்படுத்துவது எப்படி? அமீர்கான் சொல்லும் பெர்ஃபெக்ட் வழி; சாலை விழிப்புணர்வு 2026
செய்தி முன்னோட்டம்
இந்தியச் சாலைகளில் பாதுகாப்பை உறுதி செய்யும் நோக்கில் 'சடக் சுரக்ஷா அபியான் 2026' (Sadak Suraksha Abhiyan 2026) விழிப்புணர்வுப் பிரச்சாரத்தில் பாலிவுட் நடிகர் அமீர் கான் இணைந்துள்ளார். இந்தியத் தேசிய நெடுஞ்சாலை ஆணையம் (NHAI) பகிர்ந்துள்ள ஒரு வீடியோவில், இந்திய வாகன ஓட்டிகளிடையே நிலவும் மிக மோசமான பழக்கமான வாகனம் ஓட்டும்போது மொபைல் போன் பயன்படுத்துவது குறித்து அவர் தனது கவலையைப் பகிர்ந்துள்ளார். ஒரு சில நொடிகள் போனைப் பார்ப்பது கூடப் பெரிய விபத்துகளுக்கு வழிவகுக்கும் என்றும், இது உங்களை மட்டுமின்றி சாலையில் செல்லும் மற்றவர்களையும் ஆபத்தில் தள்ளும் என்றும் அவர் எச்சரித்துள்ளார்.
கூகுள் மேப்ஸ்
கூகுள் மேப்ஸைப் பாதுகாப்பாகப் பயன்படுத்துவது எப்படி?
வாகனம் ஓட்டும்போது வழி தெரிந்துகொள்வதற்காகப் பலரும் அடிக்கடி மொபைல் திரையைப் பார்ப்பதை வழக்கமாகக் கொண்டுள்ளனர். இதனைத் தவிர்க்குமாறு அறிவுறுத்தியுள்ள அமீர் கான், கூகுள் மேப்ஸ் போன்ற செயலிகளில் உள்ள 'வாய்ஸ் கைடட் நேவிகேஷன்' வசதியைப் பயன்படுத்துமாறு பரிந்துரைத்துள்ளார். இதன் மூலம் சாலையிலிருந்து கவனத்தைத் திருப்பாமல், ஆடியோ அறிவுறுத்தல்கள் மூலமாகவே வழியைத் தெரிந்துகொள்ள முடியும். பயணம் தொடங்குவதற்கு முன்பே இலக்கை நிர்ணயித்துவிட்டு, ஒலிக் குறிப்புகளைக் கவனிப்பது விபத்துகளைத் தவிர்க்க உதவும் ஒரு 'பெர்ஃபெக்ட்' வழியாகும்.
மொபைல் போன் பயன்பாடு
மொபைல் போன் பயன்பாடும் உயிரிழப்புப் புள்ளிவிபரங்களும்
டெல்லி ஐஐடியின் போக்குவரத்து ஆராய்ச்சி மையம் வெளியிட்டுள்ள ஆய்வறிக்கையின்படி, இந்தியாவில் மொபைல் போன் பயன்படுத்தியதால் ஏற்பட்ட உயிரிழப்புகள் ஆண்டுக்கு ஆண்டு அதிகரித்து வருவது அதிர்ச்சியை ஏற்படுத்தியுள்ளது. 2021ல் 1,040 ஆக இருந்த உயிரிழப்புகள் 2022ல் 1,132 ஆக உயர்ந்துள்ளன. அதேபோல் தேசிய நெடுஞ்சாலைகளில் நடக்கும் மொத்த விபத்து மரணங்களும் 61,000ஐத் தாண்டியுள்ளது. சிறிய கவனச்சிதறல் கூட விலைமதிப்பற்ற உயிரைப் பறிக்கும் என்பதால், வாகன ஓட்டிகள் அதிக எச்சரிக்கையுடன் இருக்க வேண்டும் என இந்த ஆய்வுகள் வலியுறுத்துகின்றன.
பாதுகாப்பான பயணம்
பாதுகாப்பான பயணத்திற்கான எளிய வழிமுறைகள்
ஒருவேளை நீங்கள் போனைப் பயன்படுத்த வேண்டிய கட்டாயம் ஏற்பட்டால், பாதுகாப்பான இடத்தில் வாகனத்தை நிறுத்திவிட்டுப் பேசுவதே சிறந்தது. வாகனத்தைச் சாலையின் ஓரத்தில் நிறுத்திவிட்டு, தேவைப்பட்டால் 'ஹசார்ட் லைட்டுகளை' ஒளிரவிட்டுப் பின்னர் போனைப் பயன்படுத்தலாம். உங்கள் காரில் 'ஆண்ட்ராய்டு ஆட்டோ' அல்லது 'ஆப்பிள் கார்பிளே' வசதி இருந்தால், போனை கையில் எடுக்காமல் திரையிலேயே வழிகளைப் பார்க்கலாம். டிராஃபிக் சிக்னல்களில் நிற்கும்போதும் மொபைலில் மெசேஜ் அனுப்புவதைத் தவிர்க்க வேண்டும். ஏனெனில் அந்தச் சிறிய நேரமும் உங்கள் எதிர்வினை ஆற்றலைக் குறைத்து விபத்திற்கு வித்திடும்.