2026 ஃபோக்ஸ்வேகன் டைகுன் அறிமுகம்: புதிய டிசைன் மற்றும் சக்திவாய்ந்த அம்சங்களுடன் களமிறங்கியது! முழு விவரம்
செய்தி முன்னோட்டம்
ஃபோக்ஸ்வேகன் நிறுவனம் தனது புகழ்பெற்ற டைகுன் எஸ்யூவி காரின் புதிய ஃபேஸ்லிஃப்ட் மாடலை இந்திய சந்தையில் அறிமுகப்படுத்தியுள்ளது. 2021 இல் அறிமுகமான பிறகு இந்த காருக்கு வழங்கப்படும் முதல் பெரிய அப்டேட் இதுவாகும். இந்த புதிய மாடலில் முகப்புப் பகுதி முற்றிலும் மாற்றியமைக்கப்பட்டுள்ளது. டிகுவான் காரால் ஈர்க்கப்பட்ட புதிய ஹெட்லைட்கள் மற்றும் லோகோவுடன் இணையும் எல்இடி டிஆர்எல் விளக்குகள் இதற்கு ஒரு கம்பீரமான தோற்றத்தைத் தருகின்றன. பின்புறத்தில் இணைக்கப்பட்ட டெயில் லைட்கள் மற்றும் கருப்பு நிறத்திலான டைகுன் சின்னம் ஆகியவை நவீன டிசைனை உறுதிப்படுத்துகின்றன. அவகேடோ பேர்ல் மற்றும் ஸ்டீல் கிரே உட்பட மொத்தம் 9 கவர்ச்சிகரமான நிறங்களில் இந்த கார் கிடைக்கிறது.
தொழில்நுட்பம்
அதிநவீன உட்புற வசதிகள் மற்றும் 'ஹலோ ஃபோக்ஸ்வேகன்' தொழில்நுட்பம்
புதிய டைகுன் காரின் உட்புறம் தொழில்நுட்ப ரீதியாகப் பல மாற்றங்களைக் கண்டுள்ளது. இதில் 15க்கும் மேற்பட்ட செயலிகளைப் பயன்படுத்தக்கூடிய 10.09 இன்ச் இன்ஃபோடெயின்மென்ட் சிஸ்டம் மற்றும் மேப் வசதியுடன் கூடிய 9 இன்ச் டிஜிட்டல் டிரைவர் கிளஸ்டர் வழங்கப்பட்டுள்ளது. குறிப்பாக 'ஹலோ ஃபோக்ஸ்வேகன்' என்ற வாய்ஸ் அசிஸ்ட் வசதி மூலம் ஏசி மற்றும் இசை போன்றவற்றை குரல் கட்டளை மூலமே கட்டுப்படுத்தலாம். மேலும் பனோரமிக் சன்ரூஃப், 6 வழிகளில் அட்ஜஸ்ட் செய்யக்கூடிய காற்றோட்டமான முன் இருக்கைகள் மற்றும் ஸ்மார்ட் டச் கிளைமேட் ஏசி போன்றவை பயணிகளுக்குச் சொகுசான அனுபவத்தை வழங்குகின்றன.
பாதுகாப்பில் முதலிடம்
5-ஸ்டார் ஜிஎன்ஏபி ரேட்டிங்
பாதுகாப்பிற்குப் பெயர் போன ஃபோக்ஸ்வேகன், இந்த புதிய மாடலிலும் தனது தரத்தைத் தக்கவைத்துக் கொண்டுள்ளது. 6 ஏர்பேக்குகள், எலக்ட்ரானிக் ஸ்டெபிலிட்டி கன்ட்ரோல், மல்டி கொலிஷன் பிரேக்ஸ் மற்றும் முன்புறம்-பின்புறம் பார்க்கிங் சென்சார்கள் என 40க்கும் மேற்பட்ட பாதுகாப்பு அம்சங்கள் இதில் இடம்பெற்றுள்ளன. இதன் காரணமாக, பெரியவர்கள் மற்றும் குழந்தைகளுக்கான பாதுகாப்பில் இந்த கார் 5-ஸ்டார் ஜிஎன்ஏபி (GNAP) மதிப்பீட்டைப் பெற்றுள்ளது. இது குடும்பங்களுடன் பயணம் செய்பவர்களுக்கு ஒரு பாதுகாப்பான தேர்வாக அமையும்.
கியர்பாக்ஸ்
மேம்படுத்தப்பட்ட இன்ஜின் மற்றும் கியர்பாக்ஸ் தேர்வுகள்
செயல்பாட்டைப் பொறுத்தவரை, 1.0 லிட்டர் டர்போ பெட்ரோல் இன்ஜின் (114 hp, 178 Nm) மற்றும் 1.5 லிட்டர் டர்போ பெட்ரோல் இன்ஜின் (147 hp, 250 Nm) என இரண்டு ஆப்ஷன்கள் உள்ளன. இதில் கவனிக்கத்தக்க மாற்றமாக, 1.0 லிட்டர் இன்ஜினில் இருந்த பழைய 6 ஸ்பீடு ஆட்டோமேட்டிக் கியர்பாக்ஸிற்குப் பதிலாகப் புதிய 8 ஸ்பீடு ஆட்டோமேட்டிக் கியர்பாக்ஸ் அறிமுகம் செய்யப்பட்டுள்ளது. 1.5 லிட்டர் இன்ஜினில் வழக்கம்போல 6 ஸ்பீடு மேனுவல் மற்றும் 7 ஸ்பீடு டிஎஸ்ஜி (DSG) கியர்பாக்ஸ் தேர்வுகள் தொடர்கின்றன. சந்தையில் ஹூண்டாய் கிரெட்டா, ரெனால்ட் டஸ்டர், டாடா சியரா மற்றும் மாருதி விக்டோரிஸ் போன்ற கார்களுக்கு இது நேரடிப் போட்டியாக இருக்கும்.