சவுதி அரேபியாவுக்கு யுரேனியம் செறிவூட்ட அனுமதி அளிக்கும் அமெரிக்கா; ட்ரம்ப்பின் அதிரடி முடிவால் உலக நாடுகள் அதிர்ச்சி
செய்தி முன்னோட்டம்
அமெரிக்க அதிபர் டொனால்ட் ட்ரம்ப், சவுதி அரேபியாவுடன் பல்லாயிரம் கோடி டாலர் மதிப்பிலான வரலாற்றுச் சிறப்புமிக்க சிவில் அணுசக்தி ஒப்பந்தத்திற்கு ஒப்புதல் அளித்துள்ளதாக தி வால் ஸ்டிரீட் ஜர்னல் செய்தி வெளியிட்டுள்ளது. இந்த ஒப்பந்தத்தின் மூலம் சவுதி அரேபியா தனது சொந்த மண்ணிலேயே யுரேனியத்தைச் செறிவூட்ட அனுமதி வழங்கப்படும் எனக் கூறப்படுகிறது. வழக்கமாக அமெரிக்கா பிற நாடுகளுடன் மேற்கொள்ளும் அணுசக்தி ஒப்பந்தங்களில் அணு ஆயுதத் தயாரிப்பைத் தடுப்பதற்கான கடுமையான கட்டுப்பாடுகள் சேர்க்கப்படும். ஆனால், சவுதியுடனான இந்த புதிய ஒப்பந்தத்தில் அத்தகைய பாதுகாப்பு அம்சங்கள் தவிர்க்கப்பட்டுள்ளன.
தளர்வுகள்
வழக்கத்திற்கு மாறான தளர்வுகள்
அணு ஆயுதம் தயாரிக்கத் தேவையான யுரேனியம் செறிவூட்டல் மற்றும் பயன்பாடு முடிந்த அணு எரிபொருளை மறுசுழற்சி செய்தல் போன்ற பணிகளுக்குத் தடை விதிக்கும் கோல்ட் ஸ்டாண்டர்ட் பாதுகாப்பு அம்சம் இந்த ஒப்பந்தத்தில் இல்லை.
சர்வதேச அணுசக்தி முகமையின் (IAEA) கூடுதல் நடைமுறை எனும் தீவிரக் கண்காணிப்பு விதிமுறைகள் இதிலிருந்து விலக்கப்பட்டுள்ளன.
இதன் மூலம் ஐ.நா அணுசக்தி அமைப்பு சவுதியின் அணு உலைகளில் திடீர் சோதனைகளை மேற்கொள்ள முடியாது.
அதற்குப் பதிலாக அமெரிக்காவும் சவுதியும் மட்டுமே பரஸ்பரம் கண்காணிப்பை மேற்கொள்ளும்.
வணிகம்
பல்லாயிரம் கோடி டாலர் வணிகம்
அடுத்த 30 ஆண்டுகள் செல்லுபடியாகும் இந்த ஒப்பந்தத்தின் கீழ், சவுதி அரேபியாவின் சிவில் அணுசக்தி திட்டத்தை உருவாக்குவதில் அமெரிக்க நிறுவனங்களுக்கு முன்னுரிமை வழங்கப்படும். இது குறித்து '123 ஒப்பந்தம்' உள்ளிட்ட ஆவணங்களை அமெரிக்க நாடாளுமன்றத்தின் ஒப்புதலுக்கு ட்ரம்ப் நிர்வாகம் விரைவில் சமர்ப்பிக்கவுள்ளது.
"சவுதி அரேபியாவுக்குத் தன்னிச்சையாக யுரேனியம் செறிவூட்ட அனுமதிப்பது, வருங்காலத்தில் அந்நாடு அணு ஆயுதம் தயாரிப்பதற்கான பாதையை அமைத்துக் கொடுக்கும்" என்று சர்வதேச அணுசக்தி வல்லுநர்கள் எச்சரிக்கின்றனர்.
முன்னதாக, சவுதி அரேபியாவின் பட்டத்து இளவரசர் முஹம்மது பின் சல்மான், பிராந்தியப் போட்டியாளரான ஈரான் அணு ஆயுதத்தைப் பெற்றால், சவுதி அரேபியாவும் கண்டிப்பாக அணு ஆயுதத்தைத் தயாரிக்கும் என்று கூறியிருந்தது குறிப்பிடத்தக்கது.