ஞாயிற்றுக்கிழமை மாலை 6 மணி; ஹமாஸுக்கு கெடு விதித்தார் அமெரிக்க அதிபர் டொனால்ட் டிரம்ப்
செய்தி முன்னோட்டம்
அமெரிக்க அதிபர் டொனால்ட் டிரம்ப், ஹமாஸ் அமைதித் திட்டத்தை ஏற்றுக் கொள்வதற்கு ஞாயிற்றுக்கிழமை மாலை 6 மணி (வாஷிங்டன், டி.சி. நேரம்) வரை காலக்கெடு விதித்து வெள்ளிக்கிழமை (அக்டோபர் 3) கடுமையான எச்சரிக்கை விடுத்தார். இந்த 20 அம்சத் திட்டத்தை ஹமாஸ் ஏற்கத் தவறினால், அந்த அமைப்புக்கு எதிராக இதுவரை யாரும் கண்டிராத பேரழிவு ஏற்படும் என்றும் ட்ரம்ப் ட்ரூத் சோஷியல் தளத்தில் எச்சரித்தார். அக்டோபர் 7 தாக்குதல்களுக்காக ஹமாஸை கொடூரமான மற்றும் வன்முறையான அச்சுறுத்தல் என்று டிரம்ப் கடுமையாக விமர்சித்தார். அந்தத் தாக்குதல்களுக்குப் பதிலடியாக, ஹமாஸ் தனது 25,000க்கும் மேற்பட்டவர்களை ஏற்கனவே இழந்துவிட்டதாகவும், மீதமுள்ளவர்கள் ராணுவ ரீதியாகச் சிக்கியுள்ளனர் என்றும் அவர் கூறினார்.
முக்கியம் அம்சங்கள்
20 அம்சத் திட்டத்தின் முக்கிய அம்சங்கள்
டொனால்ட் டிரம்பின் இந்த இறுதி எச்சரிக்கை, அமெரிக்கா, இஸ்ரேல் மற்றும் மத்தியக் கிழக்கின் பல வலுவான மற்றும் பணக்கார நாடுகள் இணைந்து ஒப்புக்கொண்ட ஒரு பரந்த உடன்படிக்கையின் ஒரு பகுதியாகும். டிரம்பின் 20 அம்சத் திட்டம், ஹமாஸ் உடனடியாக மீதமுள்ள அனைத்து இஸ்ரேலிய பணயக்கைதிகளையும், இறந்தவர்களின் உடல்களையும் விடுவிக்க வேண்டும் என்று கோருகிறது. இதற்கு ஈடாக, ஹமாஸ் ஆயுதங்களைக் களைந்தால் மட்டுமே இஸ்ரேலிய படைகள் திரும்பப் பெறப்படும் என்றும் திட்டம் கூறுகிறது. மேலும், காசா பயங்கரவாதம் இல்லாத பகுதியாக மாற்றப்பட வேண்டும், இஸ்ரேல் ஒரு பாதுகாப்பு எல்லையைப் பராமரிக்கும் மற்றும் சர்வதேச அமைப்புகள் மனிதாபிமான உதவிகளை நிர்வகிக்கும் என்றும் அவர் முன்மொழிந்துள்ளார்.