பிரதமர் மோடியும் சீன அதிபர் ஜி ஜின்பிங்கும் சீனாவில் சந்திப்பு; இருதரப்பு உறவுகளை வலுப்படுத்த உறுதி
செய்தி முன்னோட்டம்
ஷாங்காய் ஒத்துழைப்பு அமைப்பு (SCO) மாநாட்டில் பங்கேற்பதற்காகச் சீனா சென்றுள்ள பிரதமர் நரேந்திர மோடி, சீன அதிபர் ஜி ஜின்பிங்கை ஞாயிற்றுக்கிழமை (ஆகஸ்ட் 31) அன்று சந்தித்து இருதரப்பு உறவுகள் குறித்துப் பேசினார். திட்டமிடப்பட்ட 40 நிமிடங்களுக்குப் பதிலாக, 55 நிமிடங்கள் நீடித்த இந்தச் சந்திப்பு, இந்தியா-சீனா உறவில் நேர்மறையான போக்கைக் குறிப்பதாகக் கருதப்படுகிறது. மாநாட்டை வெற்றிகரமாக நடத்தியதற்காக அதிபர் ஜி ஜின்பிங்கை பிரதமர் மோடி வாழ்த்தினார். மேலும், இருதரப்பு உறவுகளை மேம்படுத்த இந்தியா கடமைப்பட்டுள்ளது என்றார். இரு நாடுகளுக்கும் இடையே விரைவில் இருதரப்பு விமானங்கள் மீண்டும் தொடங்கப்படும் என்றும் அவர் அறிவித்தார். இது இருதரப்புப் பயணங்கள் மற்றும் பொருளாதாரப் பரிவர்த்தனைகளைச் சீரமைப்பதற்கான ஒரு முக்கியப் படியாகும்.
இரண்டாவது சந்திப்பு
10 மாதங்களில் இரண்டாவது சந்திப்பு
கடந்த 10 மாதங்களில் இரு தலைவர்களுக்கும் இடையிலான இரண்டாவது சந்திப்பு இது. இதற்கு முன், 2024 ஆம் ஆண்டு ரஷ்யாவின் கசான் நகரில் நடைபெற்ற பிரிக்ஸ் மாநாட்டில் அவர்கள் சந்தித்துக்கொண்டனர். அண்மையில், எல்லையில் அமைதி மற்றும் ஸ்திரத்தன்மை நிலவுவதாகவும், கைலாஷ் மானசரோவர் யாத்திரை மீண்டும் தொடங்கப்பட்டுள்ளதாகவும் பிரதமர் மோடி குறிப்பிட்டார். இந்தச் சந்திப்பு, இந்தியா மற்றும் அமெரிக்காவுக்கு இடையிலான சமீபத்திய வர்த்தகப் பதற்றங்களுக்குப் பிறகு நடைபெறுவதால், இது முக்கியத்துவம் பெறுகிறது. ரஷ்ய கச்சா எண்ணெய் கொள்முதல் காரணமாக அமெரிக்கா இந்தியா மீது வரிகளை விதித்த நிலையில், சீனா இந்தியாவுக்கு பகிரங்கமாக ஆதரவு தெரிவித்து, அமெரிக்காவின் வர்த்தகக் கொள்கைகளை விமர்சித்தது. இந்த சூழலில், இந்தியாவின் மூலோபாய ராஜதந்திரத்தை பிரதமர் மோடியின் இந்தப் பயணம் காட்டுகிறது.