மலேசியாவில் மலரப்போகும் புதிய இந்தியா; கோலாலம்பூரில் பிரதமர் மோடி அதிரடி; தமிழக மாணவர்களுக்கு திருவள்ளுவர் ஸ்காலர்ஷிப் மற்றும் புதிய தூதரகம்
செய்தி முன்னோட்டம்
பிரதமர் நரேந்திர மோடி மலேசியாவிற்கு மேற்கொண்டுள்ள இரண்டு நாள் பயணத்தின் ஒரு பகுதியாக, சனிக்கிழமை மாலை கோலாலம்பூரில் உள்ள இந்திய வம்சாவளியினர் மத்தியில் உரையாற்றினார். இந்தப் பயணமானது இரு நாடுகளுக்கும் இடையிலான உறவு விரிவான மூலோபாயக் கூட்டாண்மை நிலைக்கு உயர்த்தப்பட்ட பிறகு நடைபெறும் முதல் பயணமாகும். இந்தியாவின் யுபிஐ பணப்பரிவர்த்தனை முறை விரைவில் மலேசியாவில் அறிமுகப்படுத்தப்படும் என்றும், மலேசியாவில் ஒரு புதிய இந்திய துணைத் தூதரகம் திறக்கப்படும் என்றும் அவர் அதிகாரப்பூர்வமாக அறிவித்தார். இது மலேசியாவில் வாழும் சுமார் 29 லட்சம் இந்திய வம்சாவளியினருக்குப் பெரும் பயனுள்ளதாக அமையும்.
கல்வி
திருவள்ளுவர் கல்வி உதவித்தொகை
தமிழகத்தின் கலாச்சாரம் மற்றும் கல்வியைப் போற்றும் வகையில், மலேசியாவில் உள்ள மாணவர்கள் இந்தியாவில் வந்து உயர் கல்வி பயில ஏதுவாக திருவள்ளுவர் கல்வி உதவித்தொகை வழங்கப்படும் என்று பிரதமர் மோடி அறிவித்தார். இது தமிழ் மொழி மற்றும் கலாச்சாரத்தை உலகளவில் கொண்டு செல்லும் முயற்சியின் ஒரு பகுதியாகும். மேலும், மலேசியாவின் மலாயா பல்கலைக்கழகத்தில் திருவள்ளுவர் இருக்கை அமைப்பதற்கான பணிகள் ஏற்கனவே முன்னெடுக்கப்பட்டுள்ள நிலையில், இந்த உதவித்தொகை மாணவர்களின் கல்வி கனவுகளை நனவாக்க உதவும்.
இந்தியா
இந்தியாவின் பொருளாதார வளர்ச்சி மற்றும் உலகளாவிய நம்பிக்கை
கடந்த 10 ஆண்டுகளில் இந்தியா அடைந்துள்ள பொருளாதார மாற்றங்களை பிரதமர் மோடி தனது உரையில் சுட்டிக்காட்டினார். இந்தியா 11 வது பெரிய பொருளாதாரத்திலிருந்து தற்போது உலகின் முதல் 3 பொருளாதார நாடுகளில் ஒன்றாக மாறப்போவதாகவும் அவர் தெரிவித்தார். நம்பிக்கை என்பது இந்தியாவின் வலுவான நாணயமாக மாறியுள்ளது என்று குறிப்பிட்ட அவர், அமெரிக்கா, ஐரோப்பிய ஒன்றியம், ஐக்கிய அரபு அமீரகம் மற்றும் ஆஸ்திரேலியா போன்ற நாடுகள் இந்தியாவுடன் வர்த்தக ஒப்பந்தங்களை மேற்கொண்டுள்ளதை நினைவுகூர்ந்தார். இந்தியா இனி வெறும் சந்தையாக மட்டுமல்லாமல், உலகளாவிய முதலீடு மற்றும் வர்த்தகத்தின் மையமாக மாறியுள்ளதாகவும் அவர் பெருமிதத்துடன் கூறினார்.
கலாச்சாரம்
கலாச்சாரப் பிணைப்பும் 800 கலைஞர்களின் சாதனையும்
இந்தியாவிற்கும் மலேசியாவிற்கும் இடையிலான ஆழமான பிணைப்பைக் குறிப்பிட்ட பிரதமர், "மலேசியாவிற்கும் கொச்சிக்கும் இடையே அதிக ஒற்றுமைகள் உள்ளன. நீங்கள் ரொட்டி சானாய் உணவை மலபார் பரோட்டாவுடன் இணைத்துள்ளீர்கள்." என்று நகைச்சுவையாகக் குறிப்பிட்டார். மலேசியப் பிரதமர் அன்வர் இப்ராஹிம் எம்ஜிஆரின் பாடல்களை விரும்பி ரசிப்பதையும், அவர் இந்தியப் பாடல்களைப் பாடுவதையும் பிரதமர் பாராட்டினார். இந்த நிகழ்வின் ஒரு பகுதியாக, பரதநாட்டியம், கதக் உள்ளிட்ட இந்தியப் பாரம்பரியக் கலைகளை 800 கலைஞர்கள் இணைந்து ஒரே மேடையில் நிகழ்த்தினர். இது மலேசிய சாதன புத்தகத்தில் (Malaysian Book of Records) இடம் பிடித்துள்ளது குறிப்பிடத்தக்கது.