அமெரிக்க பண்ணையில் பெரும் தீ விபத்து: 18,000+ மாடுகள் உயிரிழப்பு
செய்தி முன்னோட்டம்
அமெரிக்காவின் டெக்சாஸில் உள்ள 'சவுத்ஃபோர்க் டெய்ரி ஃபார்ம்ஸ்' என்ற ஒரு குடும்ப பால் பண்ணையில் ஏற்பட்ட தீ விபத்தால் 18,000க்கும் மேற்பட்ட மாடுகள் உயிரிழந்தன. இந்த சம்பவம் அமெரிக்காவில் இதுவரை பதிவு செய்யப்பட்ட தீ விபத்துகளிலேயே பெரியது என்று ராய்ட்டர்ஸ் செய்தி நிறுவனம் தெரிவித்துள்ளது. தீ விபத்து ஏற்பட்டதற்கான காரணம் இன்னும் சரியாக தெரியவில்லை. பண்ணையின் உரிமையாளர்கள் சம்பவம் குறித்து இதுவரை எந்த கருத்தும் தெரிவிக்கவில்லை. காஸ்ட்ரோ கவுண்டி ஷெரிஃப் அலுவலகத்தால் பகிரப்பட்ட படங்கள், பண்ணையில் இருந்து பெரும் புகை வெளியே வருவதை காட்டியது. எரியும் கட்டிடத்திற்குள் சிக்கியிருந்த ஒருவரை தீயணைப்பு வீரர்கள் மீட்டனர் என்று ஷெரிப் அலுவலகம் தெரிவித்துள்ளது.
details
வருத்தம் தெரிவித்த விலங்குகள் நல நிறுவனம்
பொது சுகாதாரம் மற்றும் பாதுகாப்பு காரணங்களுக்காக பண்ணைக்கு செல்லும் அனைத்து சாலைகளும் மூடப்பட்டுள்ளன. ஒவ்வொரு ஆண்டும் நூறாயிரக்கணக்கான பண்ணை விலங்குகளைக் கொல்லும் தீ விபத்துகளை தடுக்க, கூட்டாட்சி சட்டங்கள் இயற்ற வேண்டும் என்று விலங்குகள் நல நிறுவனம் (AWI) தெரிவித்துள்ளது. இத்தகைய தீ விபத்தில் இருந்து விலங்குகளை பாதுகாக்க எந்த கூட்டாட்சி விதிமுறைகளும் இதுவரை இல்லை என்று AWI வருத்தம் தெரிவித்துள்ளது. 2013 ஆம் ஆண்டு AWI இதுபோன்ற சம்பவங்களை கண்காணிக்கத் தொடங்கியதில் இருந்து, டெக்சாஸ் பண்ணையில் ஏற்பட்டிருக்கும் இந்த தீ விபத்து தான், கால்நடைகளுக்கு ஏற்பட்ட மிகப்பெரும் தீ விபத்து என்று விலங்குகள் நல நிறுவனம் (AWI) கூறியுள்ளது.