அமெரிக்கப் போர்க்கப்பலில் கைதியாக மதுரோ! நியூயார்க்கில் காத்திருக்கும் விசாரணை; டிரம்ப் அதிரடி
செய்தி முன்னோட்டம்
வெனிசுலா அதிபர் நிக்கோலஸ் மதுரோ மற்றும் அவரது மனைவி ஆகியோர் அமெரிக்கப் படைகளால் சிறைபிடிக்கப்பட்டு, தற்போது அமெரிக்கப் போர்க்கப்பல் ஒன்றில் நியூயார்க்கிற்குக் கொண்டு செல்லப்படுவதாக அதிபர் டொனால்ட் டிரம்ப் தெரிவித்துள்ளார். அங்கு அவர்கள் மீது கடுமையான குற்றச்சாட்டுகளின் கீழ் சட்டரீதியான நடவடிக்கைகள் மேற்கொள்ளப்பட உள்ளன. அதிபர் டிரம்ப் இன்று (ஜனவரி 3) அளித்த நேர்காணலில் பகிர்ந்து கொண்ட முக்கியத் தகவல்கள் பின்வருமாறு: மதுரோ மற்றும் அவரது மனைவி ஐவோ ஜிமா என்ற அமெரிக்கப் போர்க்கப்பலில் வைக்கப்பட்டுள்ளனர். அவர்கள் தற்போது நியூயார்க்கை நோக்கிப் பயணித்துக் கொண்டிருக்கின்றனர். நியூயார்க்கிற்கு அழைத்து வரப்பட்டதும், மதுரோவின் மீது போதைப்பொருள் கடத்தல் மற்றும் பயங்கரவாதம் தொடர்பான புகார்களின் கீழ் வழக்குத் தொடரப்பட்டு விசாரணை நடத்தப்படும்.
வெனிசுலாவின் எதிர்காலம்
வெனிசுலாவின் தற்போதைய அரசியல் சூழல் குறித்து டிரம்ப் பேச்சு
டிரம்ப் வெனிசுலாவின் எதிர்காலம் குறித்து கூறுகையில், "மதுரோ இல்லாத வெனிசுலாவை யார் நிர்வகிக்க வேண்டும் என்பது குறித்து அமெரிக்கா முக்கிய முடிவுகளை எடுக்கும். அடுத்ததாக அந்த நாட்டை யார் ஆளப்போகிறார்கள் என்பதில் நாங்கள் தீவிரமாக ஈடுபடுவோம். மதுரோ விட்டுச் சென்ற இடத்திலிருந்து மற்றுமொருவர் ஆட்சியைப் பிடித்து அதே முறையைத் தொடர நாங்கள் அனுமதிக்க மாட்டோம்." என்று உறுதியாகத் தெரிவித்துள்ளார். ஒரு நாட்டின் அதிபரை மற்றொரு நாட்டுப் படைகள் சிறைபிடித்துச் சென்று விசாரணை நடத்துவது சர்வதேச அளவில் பெரும் விவாதங்களை உருவாக்கியுள்ளது. இதற்கு முன்னதாக பனாமா நாட்டின் அதிபர் மேனுவல் நோரிகா இதேபோன்று அமெரிக்காவால் சிறைபிடிக்கப்பட்டது குறிப்பிடத்தக்கது. அமெரிக்காவின் இந்த அதிரடி நடவடிக்கையைத் தொடர்ந்து, தென் அமெரிக்க நாடுகளில் அரசியல் ஸ்திரத்தன்மை கேள்விக்குறியாகியுள்ளது.