ரஷியாவில் இருந்து கோவா வந்த விமானத்துக்கு வெடிக்குண்டு மிரட்டல் - அவசரமாக தரையிறக்கம்
ரஷிய தலைநகர் மாஸ்கோ, பெர்ம் சர்வதேச விமான நிலையத்தில் இருந்து அஜூர் ஏர் விமானம் கோவா நோக்கி புறப்பட்டது. இதில் 7 விமான சிப்பந்திகள், 2 குழந்தைகள் உள்பட மொத்தம் 238 பயணிகள் பயணம் செய்தனர். இந்நிலையில் மாஸ்கோவில் இருந்து புறப்பட்ட இந்த விமானத்திற்கு வெடிகுண்டு மிரட்டல் வந்ததாக கூறப்படுகிறது. மாஸ்கோவில் இருந்து கிளம்பிய இந்த விமானம் இன்று அதிகாலை 4.15 மணியளவில் கோவா டபோலிம் விமான நிலையத்திற்கு வந்திருக்க வேண்டும். ஆனால் அந்த அஜூர் விமானத்தில் வெடிகுண்டு இருப்பதாக கோவா விமான நிலைய இயக்குனருக்கு நள்ளிரவு 12.30 மணியளவில் இமெயில் வந்துள்ளது.
தரையிறக்கப்பட்ட விமானத்தை வெடிகுண்டு நிபுணர்கள் ஆய்வு
இதனையடுத்து கோவா விமானநிலைய இயக்குனர் அந்த அஜூர் விமானத்திற்கு கட்டுப்பாட்டு அறையில் இருந்து தகவல் அளித்துள்ளார். தகவலறிந்தவுடன் அந்த விமானத்தை உஸ்பெகிஸ்தானுக்கு திருப்ப முடிவு செய்யப்பட்டது. தொடர்ந்து அந்த விமானம் அவசரமாக உஸ்பெகிஸ்தான் விமானநிலையத்தில் தரையிறக்கம் செய்யப்பட்டுள்ளது. வெடிகுண்டு மிரட்டல் விடுக்கப்பட்ட விமானம் தரையிறக்கப்படுவதால் அந்த விமானநிலையத்தில் பெரும் பாதுகாப்பு ஏற்பாடுகள் செய்யப்பட்டிருந்தது. அதனை தொடர்ந்து விமானம் தரையிறங்கியதும் பயணிகள் அனைவரும் பத்திரமாக தரையிறக்கப்பட்டனர். அதன்பின் வெடிகுண்டு நிபுணர்கள் உள்ளே சென்று சோதனையில் ஈடுபட்டார்கள். சோதனையில் வெடிகுண்டு எதுவும் சிக்கவில்லை. ரஷியாவில் இருந்து கோவா வரும் விமானத்திற்கு வெடிகுண்டு மிரட்டல் விடுவது இது 2வது முறையாகும். கடந்த 9ம்தேதி ரஷியாவில் இருந்து கோவா வந்த விமானத்திற்கு இதே மாதிரி மிரட்டல் விடுக்கப்பட்டது குறிப்பிடத்தக்கது.
