வேலைக்கே போகல.. ஆனா சம்பள உயர்வு வேணும்; 15 வருஷம் லீவு போட்டுட்டு கம்பெனி மேல கேஸ் போட்ட ஐடி ஊழியர்
செய்தி முன்னோட்டம்
ஐடி துறையில் பணிபுரியும் ஐயன் கிளிஃபோர்ட் என்ற ஊழியர், கடந்த 15 ஆண்டுகளாக ஒரு நாள் கூட வேலைக்குச் செல்லாமல், தனது நிறுவனத்திடம் இருந்து சம்பள உயர்வு கேட்டு நீதிமன்றத்தில் வழக்குத் தொடர்ந்த சம்பவம் உலகளவில் அதிர்ச்சியை ஏற்படுத்தியுள்ளது. பிரிட்டனைச் சேர்ந்த இவர், ஐபிஎம் போன்ற ஒரு மிகப்பெரிய சர்வதேச தொழில்நுட்ப நிறுவனத்தில் பணிபுரிந்து வந்தார். 2008 ஆம் ஆண்டு முதல் உடல்நலக் குறைவு காரணமாக அவர் மருத்துவ விடுப்பில் இருந்து வருகிறார்.
கருணை
நிறுவனத்தின் கருணை மற்றும் ஒப்பந்தம்
கிளிஃபோர்ட் உடல்நிலை சரியில்லாமல் போனபோது, நிறுவனம் அவரை வேலையை விட்டு நீக்காமல் ஒரு சிறப்பு ஒப்பந்தத்தை மேற்கொண்டது. அந்த ஒப்பந்தத்தின்படி, அவர் வேலைக்கு வராவிட்டாலும், அவருக்கு ஆண்டுதோறும் ஒரு குறிப்பிட்ட தொகை (சுமார் 54,000 பவுண்டுகள் - இந்திய மதிப்பில் சுமார் 55 லட்சம் ரூபாய்) சம்பளமாக வழங்கப்பட்டு வந்தது. மேலும், அவருக்கு 65 வயது ஆகும் வரை இந்தச் சம்பளம் தொடர்ந்து வழங்கப்படும் என்றும் நிறுவனம் உறுதி அளித்திருந்தது.
வாதம்
ஊழியரின் வாதம் என்ன?
இவ்வளவு சலுகைகள் இருந்தபோதிலும், கிளிஃபோர்ட் லண்டன் நீதிமன்றத்தில் ஒரு வினோதமான வழக்கைத் தொடர்ந்தார். அவரது வாதம் என்னவென்றால், "கடந்த 15 ஆண்டுகளாக எனக்கு வழங்கப்பட்டு வரும் 54,000 பவுண்டுகள் சம்பளம் அப்படியே உள்ளது. பணவீக்கம் காரணமாக தற்போது அந்தப் பணம் போதுமானதாக இல்லை. எனவே, நிறுவனம் எனக்கு சம்பள உயர்வு வழங்க வேண்டும்" என்பதுதான். ஒரு மாற்றுத்திறனாளி ஊழியர் என்பதால் தனக்கு வழங்கப்பட வேண்டிய உரிமைகள் மறுக்கப்படுவதாக அவர் குற்றம் சாட்டினார்.
தீர்ப்பு
நீதிமன்றத்தின் அதிரடி தீர்ப்பு
இந்த வழக்கை விசாரித்த நீதிபதி பால் ஹவுஸ்வெல், கிளிஃபோர்ட்டின் மனுவைத் தள்ளுபடி செய்தார். "வேலைக்கே வராத ஒரு ஊழியருக்கு ஆண்டுக்கு 50 லட்சம் ரூபாய்க்கும் மேல் ஒரு நிறுவனம் சம்பளம் வழங்குவதே மிகப்பெரிய சலுகைதான். இது ஒரு மிகச்சிறந்த பலனாகவே கருதப்பட வேண்டும். இதில் சம்பள உயர்வு கோருவது நியாயமற்றது" என்று நீதிபதி தெரிவித்தார். இந்தத் தீர்ப்பு தற்போது சமூக வலைதளங்களில் விவாதப் பொருளாகியுள்ளது.