ஹிஜாப் அணியாத பெண்களை கண்டறிவதற்கு பொது இடங்களில் கேமராக்களைப் பொருத்திய ஈரான் அரசு
செய்தி முன்னோட்டம்
பெண்கள் அணியும் ஆடையை கட்டுப்படுத்தும் நோக்கில் ஈரான் அதிகாரிகள் பொது இடங்களிலும் சாலைகளிலும் கேமராக்களை நிறுவி, ஹிஜாப் அணியாத பெண்களுக்கு அபராதம் விதிக்க உள்ளதாக ஈரானிய காவல்துறை அறிவித்துள்ளது.
ஹிஜாப் அணியாதவர்கள் அதன் "விளைவுகள் குறித்த எச்சரிக்கையை குறுஞ்செய்தியாக பெறுவார்கள்" என்று காவல்துறை ஒரு அறிக்கையில் தெரிவித்துள்ளது.
இந்த நடவடிக்கை "ஹிஜாப் சட்டத்திற்கு எதிரான எதிர்ப்பைத் தடுக்கும்" நோக்கத்தோடு செயல்படுத்தப்பட்டுள்ளது.
கடந்த செப்டம்பர் மாதம், 22 வயதான குர்திஷ் பெண் ஒருவர் கலாச்சார காவலர்களின் காவலில் இருந்த போது உயிரிழந்தார்.
இதனையடுத்து நடந்த ஈரான் போராட்டத்திற்கு பிறகு, ஹிஜாப் அணியாத ஈரானியப் பெண்களின் எண்ணிக்கை அதிகரித்து வருகிறது.
அந்த குர்திஷ் பெண் மஹ்சா அமினி ஹிஜாப் அணியாதற்காக கலாச்சார காவலர்களால் கைது செய்யப்பட்டார்.
ஈரான்
ஹிஜாப் அணியாமல் தங்கள் எதிர்ப்பை தெரிவிக்கும் ஈரானிய பெண்கள்
ஹிஜாப் விதியை மீறினால் கைது செய்யப்படுவோம் என்று தெரிந்தும், பல ஈரானிய பெண்கள் கலாச்சார காவலர்களை எதிர்க்கும் வகையில் ஹிஜாப் அணியாமல் தங்கள் எதிர்ப்பை தெரிவித்து வருகின்றனர்.
நாடு முழுவதும் உள்ள மால்கள், உணவகங்கள், கடைகள் மற்றும் தெருக்களில் பெண்கள் பரவலாக ஹிஜாப் அணியாமல் வலம் வருவதை பல வைரலான வீடியோக்கள் நமக்கு காட்டுகின்றன.
1979 ஈரானிய புரட்சிக்குப் பிறகு, பெண்கள் தங்கள் தலைமுடியையும் உருவத்தையும் மறைக்க நீண்ட, தளர்வான ஆடைகளை அணிய வேண்டும் என்ற சட்டம் கொண்டுவரப்பட்டது.
இந்த இஸ்லாமிய ஷரியா சட்டத்தை மீறுவர்களுக்கு அபராதம் விதிக்கப்படும் அல்லது அவர்கள் கைது செய்யப்படுவார்கள்.
இந்த விதிகளை தளர்த்தும் எண்ணமே இல்லை என்று மார்ச் 30ஆம் தேதி ஈரான் அரசு தெரிவித்திருந்தது.