இஸ்ரேல் பிரதமர் பெஞ்சமின் நெதன்யாகுவின் வீட்டை குறிவைத்து ட்ரோன் தாக்குதல்
செய்தி முன்னோட்டம்
சிசேரியாவில் உள்ள இஸ்ரேல் பிரதமர் பெஞ்சமின் நெதன்யாகுவின் வீட்டை நோக்கி ட்ரோன் மூலம் ஆளில்லா விமானத் தாக்குதல் ஒன்று சனிக்கிழமை (அக்டோபர் 19) நடத்தப்பட்டது.
தாக்குதலின் போது பிரதமரும் அவரது மனைவியும் வீட்டில் இல்லை என்றும், உயிர் சேதம் எதுவும் ஏற்படவில்லை என்றும் பிரதமர் அலுவலகம் உறுதி செய்துள்ளது.
லெபனானில் இருந்து வந்த ஆளில்லா விமானம் ஒரு கட்டிடத்தில் மோதியதாக இஸ்ரேல் ராணுவம் தெரிவித்துள்ளது.
இஸ்ரேலிய எல்லைக்குள் நுழைந்த இரண்டு ஆளில்லா விமானங்கள் வான் பாதுகாப்புப் படையினரால் தடுத்து நிறுத்தப்பட்டன. நெதன்யாகுவின் இல்லத்தின் மீதான ட்ரோன் தாக்குதலுக்கு ஹெஸ்புல்லாவோ அல்லது வேறு எந்த போராளிக் குழுவோ உரிமை கோரவில்லை.
எனினும், ஹீப்ரு மொழி மூலங்களை மேற்கோள் ஹிஸ்புல்லா இதில் ஈடுபட்டிருக்கலாம் எனக் கூறப்படுகிறது.
தொடர்ந்து மோதல்
சின்வாரின் மரணத்திற்குப் பிறகும் தொடர்ந்து போராடுவதாக ஹமாஸ் உறுதி
2023 அக்டோபர் 7இல் இஸ்ரேல் மீதான தாக்குதலுக்கு மூளையாக இருந்த ஹமாஸ் தலைவர் யஹ்யா சின்வார் இறந்த சில நாட்களுக்குப் பிறகு நெதன்யாகுவின் இல்லத்திற்கு அருகில் ஆளில்லா விமானத் தாக்குதல் நடத்தப்பட்டது கவனம் பெற்றுள்ளது.
சின்வார் இறந்த போதிலும், ஹமாஸ், சின்வாரின் துணைத் தலைவர் கலீல் அல்-ஹய்யாவுடன் தனது போராட்டத்தைத் தொடர்வதாக உறுதியளித்துள்ளது.
ஈரானின் உச்ச தலைவர் அயதுல்லா அலி கமேனியும் ஹமாஸுக்கு ஆதரவாக குரல் கொடுத்தார். சின்வாரின் இழப்பு எதிர்ப்பின் அச்சை நிறுத்தாது என்று அவர் தெரிவித்துள்ளது குறிப்பிடத்தக்கது.
இதற்கிடையே, லெபனான் சுகாதார அமைச்சின் புள்ளிவிபரங்களின்படி, செப்டம்பர் பிற்பகுதியில் இருந்து, லெபனானில் இஸ்ரேல்-ஹிஸ்புல்லா மோதலில் குறைந்தது 1,418 பேர் உயிரிழந்துள்ளனர்.