பறவைக் காய்ச்சல் வைரஸ் மட்டும் உருமாற்றம் அடைந்தால் கொரோனாவை விட ஆபத்து; பிரெஞ்சு நிறுவனம் எச்சரிக்கை
செய்தி முன்னோட்டம்
பறவைகள், கோழிகள் மற்றும் பாலூட்டிகளிடையே பரவி வரும் பறவைக் காய்ச்சல் வைரஸ், மனிதர்களுக்கு இடையில் பரவும் வகையில் உருமாற்றம் அடைந்தால், அது கொரோனாவை விட மோசமான பெருந்தொற்றாக மாறக்கூடும் என்று பிரான்சின் இன்ஸ்டிட்யூட் பாஸ்டர் சுவாச நோய்த் தொற்று மையத்தின் இயக்குநர் மாரி-ஆன் ராமெக்ஸ்-வெல்டி எச்சரித்துள்ளார். உயர் நோய் விளைவிக்கும் ஏவியன் இன்ஃப்ளூயன்ஸா (HPAI) எனப்படும் இந்த வைரஸ், இதுவரை கோடிக்கணக்கான பறவைகளைக் கொன்றிருக்கிறது. ஆனால் மனிதர்களுக்கு இதன் பாதிப்பு மிக அரிதாகவே உள்ளது. இருப்பினும், இந்த வைரஸ் பாலூட்டிகளுக்கும், குறிப்பாக மனிதர்களுக்கும் ஏற்றவாறு மாறி, மனிதர்களுக்கு இடையில் பரவும் திறனைப் பெற்றால், அது ஒரு கடுமையான பெருந்தொற்று வைரஸாக மாறும் என்று நிபுணர்கள் அஞ்சுகின்றனர்.
ஆபத்து
கொரோனாவை விட ஏன் ஆபத்தானது?
பொதுவான பருவகால காய்ச்சலுக்கு எதிரான ஆன்டிபாடிகள் மக்களுக்கு இருந்தாலும், H5 பறவைக் காய்ச்சலுக்கு எதிராகப் பெரும்பாலும் எவருக்கும் ஆன்டிபாடிகள் இல்லை. கொரோனா வைரஸ் பெரும்பாலும் பாதிக்கப்படக்கூடியவர்களைத் தாக்கியது. ஆனால், இன்ஃப்ளூயன்ஸா வைரஸ்கள் குழந்தைகள் உட்பட ஆரோக்கியமானவர்களையும் கொல்லும் திறன் கொண்டவை. எனவே, ஒரு பறவைக் காய்ச்சல் பெருந்தொற்று, நாம் அனுபவித்த கொரோனாவை விட மிகவும் தீவிரமானதாக இருக்க வாய்ப்புள்ளது என்று ராமெக்ஸ்-வெல்டி தெரிவித்துள்ளார். இருப்பினும், இந்த விலங்கு சுகாதார அமைப்பின் தலைவர் கிரிகோரியோ டோரஸ், மனிதர்களிடையே பெருந்தொற்று பரவும் ஆபத்து இன்னும் மிகக் குறைவாகவே உள்ளது என்று குறிப்பிட்டுள்ளார்.