விமானப் பயணங்களில் பெரும் இடையூறு: 6,000 ஏ320 விமானங்களின் மென்பொருளை உடனடியாக அப்கிரேட் செய்ய ஏர்பஸ் உத்தரவு
செய்தி முன்னோட்டம்
ஏர்பஸ் தயாரித்த சுமார் 6,000 ஏ320 ரக விமானங்கள் மென்பொருள் மேம்படுத்தலை மேற்கொள்ள வேண்டியிருப்பதால், உலகம் முழுவதும் விமானப் பயணங்களில் பெரும் பாதிப்பு மற்றும் ரத்துகள் ஏற்பட்டுள்ளன. அக்டோபரில் ஜெட்புளூ (JetBlue) விமானத்தில் ஏற்பட்ட தொழில்நுட்பக் கோளாறு குறித்த ஆய்வைத் தொடர்ந்து, உடனடி முன்னெச்சரிக்கை நடவடிக்கை எடுக்க ஏர்பஸ் தனது வாடிக்கையாளர்களுக்கு அறிவுறுத்தியுள்ளது. விமானக் கட்டுப்பாடுகளுக்கு முக்கியமான தரவுகள் தீவிர சூரியக் கதிர்வீச்சால் சிதைக்கப்படலாம் என்று ஏர்பஸ் தெரிவித்துள்ளது. கடந்த அக்டோபர் 30 ஆம் தேதி ஜெட்புளூ ஏ320 விமானம் ஒன்று கட்டுப்பாட்டுக் கோளாறு காரணமாகத் திடீரெனக் கீழே இறங்க முயன்றது. இதனால் ஏற்பட்ட விபத்து குறித்தே இந்த ஆய்வு மேற்கொள்ளப்பட்டது.
பாதிப்பு
பயணங்களில் பாதிப்பு
ஏர்பஸ் அறிக்கையைத் தொடர்ந்து ஏர் பிரான்ஸ் நிறுவனம் வெள்ளிக்கிழமை (நவம்பர் 28) 35 விமானங்களை ரத்து செய்தது. கொலம்பியாவின் அவிங்கா விமான நிறுவனம் தனது 70 சதவீத விமானங்களை இந்தத் தொழில்நுட்பப் பிரச்சனை பாதித்துள்ளதாகவும், அடுத்த 10 நாட்களுக்குப் பயணங்களில் குறிப்பிடத்தக்க இடையூறுகள் இருக்கும் என்றும் எச்சரித்துள்ளது. அமெரிக்கன் ஏர்லைன்ஸ் நிறுவனம் உடனடியாக மென்பொருளைப் புதுப்பிக்கும் பணியைத் தொடங்கியுள்ளதாகத் தெரிவித்துள்ளது. பெரும்பாலான விமானங்களில் இந்த மென்பொருளை மாற்றுவதற்குச் சில மணிநேரங்களே ஆகும். இருப்பினும், சுமார் 1,000 விமானங்களுக்கு இந்தச் செயல்முறை முடிக்க வாரக்கணக்கில் ஆகலாம் என்று தகவல் வெளியாகியுள்ளது. பயணிகளுக்கு ஏற்படும் சிரமங்களுக்கு ஏர்பஸ் மன்னிப்புக் கோரியுள்ளதுடன், விமானப் பாதுகாப்புக்கு முதலிடம் கொடுக்கப்படுவதாக ஐரோப்பிய ஒன்றிய விமானப் பாதுகாப்பு முகமை தெரிவித்துள்ளது.