இந்தியத் தலையீடு குறித்த பாகிஸ்தானின் குற்றச்சாட்டுகளை நிராகரித்தார் ஆப்கானிஸ்தான் பாதுகாப்பு அமைச்சர்
செய்தி முன்னோட்டம்
பிராந்தியத்தில் நிலவும் பதட்டங்களுக்கு இந்தியாவைக் காரணமாக்கி பாகிஸ்தான் முன்வைக்கும் குற்றச்சாட்டுகள் ஆதாரமற்றவை, நியாயமற்றவை மற்றும் ஏற்றுக்கொள்ள முடியாதவை என்று ஆப்கானிஸ்தானின் பாதுகாப்பு அமைச்சர் மௌலவி முகமது யாக்கூப் முஜாஹித் கடுமையாக நிராகரித்துள்ளார். ஆப்கானிஸ்தான் தனது வெளியுறவுக் கொள்கையைச் சுதந்திரமாகப் பேணி வருவதாகவும், தனது தேசிய நலன்களின் அடிப்படையில் இந்தியாவுடனான உறவுகளை வலுப்படுத்தப் போவதாகவும் முஜாஹித் உறுதிப்படுத்தினார். அல் ஜசீராவிற்குப் பேட்டியளித்த அமைச்சர், ஆப்கானிஸ்தானின் கொள்கை அதன் மண்ணை மற்ற நாடுகளுக்கு எதிராகப் பயன்படுத்த ஒருபோதும் அனுமதிக்காது என்று திட்டவட்டமாகக் கூறினார். அமெரிக்கா தலைமையிலான படைகள் வெளியேறியதற்கும், தாலிபான் அரசாங்கம் மீண்டும் ஆட்சிக்கு வந்ததற்கும் பிறகு, ஆப்கானிஸ்தானுக்கும் பாகிஸ்தானுக்கும் இடையிலான உறவுகள் மோசமடைந்துள்ள நிலையில் இந்தக் கருத்து வந்துள்ளது.
சிக்கல்
எல்லை மோதலால் உறவில் சிக்கல்
எல்லைகளில் நடந்த மோதல்களும், பாகிஸ்தான் பாதுகாப்புப் படையினரை இலக்கு வைத்து நடத்தப்படும் பயங்கரவாதத் தாக்குதல்களும் இந்த உறவில் மேலும் சிக்கலை ஏற்படுத்தியுள்ளன. ஆப்கானிஸ்தானில் இருந்து வந்த தாக்குதல்களால் அக்டோபர் மாதத்தில் மட்டும் 100க்கும் மேற்பட்ட பாதுகாப்புப் பணியாளர்கள் கொல்லப்பட்டதாக பாகிஸ்தான் தரப்பு தெரிவிக்கிறது. பாகிஸ்தானுடனான உறவுகளைப் பற்றிப் பேசிய முஜாஹித், பரஸ்பர மரியாதை மற்றும் நல்ல அண்டை நாடுகளுக்குரிய கொள்கையின் அடிப்படையில் பாகிஸ்தானுடன் உறவுகளை உருவாக்க விரும்புவதாகக் கூறினார். இரு நாடுகளுக்கும் இடையேயான மோதல் யாருக்கும் பயனளிக்காது என்றும், வர்த்தக விரிவாக்கத்தில் கவனம் செலுத்த வேண்டும் என்றும் அவர் வலியுறுத்தினார்.