ஒருநாள் உலகக்கோப்பை தகுதிச் சுற்றில் பாகிஸ்தானின் சாதனையை முறியடித்த ஜிம்பாப்வே
செய்தி முன்னோட்டம்
திங்களன்று (ஜூன் 26) அமெரிக்காவுக்கு எதிரான ஒருநாள் உலகக்கோப்பை தகுதிச் சுற்று ஆட்டத்தில் சீன் வில்லியம்ஸ் தலைமையிலான ஜிம்பாப்வே கிரிக்கெட் அணி அபாரமான ஆட்டத்தை வெளிப்படுத்தி புதிய உலக சாதனை படைத்துள்ளது. கேப்டன் வில்லியம்ஸ் அபாரமாக விளையாடி 101 பந்துகளில் 174 ரன்கள் எடுத்ததன் மூலம், ஜிம்பாப்வே அணி தகுதிச் சுற்றின் கடைசி லீக் ஆட்டத்தில் 50 ஓவர்களில் 6 விக்கெட் இழப்பிற்கு 408 ரன்களை எடுத்தது. இதன் மூலம் சர்வதேச ஒருநாள் கிரிக்கெட் போட்டிகளில் பாகிஸ்தானின் சாதனையை ஜிம்பாப்வே முறியடித்துள்ளது. தற்போது நடைபெற்று வரும் தகுதிச் சுற்றில் தனது குழுவில் தொடர்ந்து ஆதிக்கம் செலுத்தி வரும் ஜிம்பாப்வே இதற்கு முன்னர் நடந்த மூன்று போட்டிகளிலும் வெற்றி பெற்றுள்ளது.
zimbabve sets new record in odi wc qualifier
ஒருநாள் உலகக்கோப்பை தகுதிச் சுற்றில் அதிக ஸ்கோர்
இந்த ஸ்கோர் மூலம் ஜிம்பாப்வே 50 ஓவர் கிரிக்கெட்டில் அவர்களின் அதிகபட்ச மற்றும் முதல் 400க்கும் அதிகமான மொத்த ஸ்கோரை பதிவு செய்தது. இதன் மூலம் ஒருநாள் கிரிக்கெட்டில் அதிக ஸ்கோர் அடித்த அணிகளில் பாகிஸ்தானை பின்னுக்கு தள்ளியுள்ளது. பாகிஸ்தானின் அதிகபட்ச ஸ்கோர் 399/1 ஆகும். இந்த ஸ்கோர் ஜூலை 2018 இல் புலவாயோவில் ஜிம்பாப்வேக்கு எதிராக எடுத்தது குறிப்பிடத்தக்கது. மேலும் ஒருநாள் உலகக் கோப்பை தகுதிச் சுற்றில் அதிக ஸ்கோரைப் பதிவு செய்த அவர்களின் முந்தைய சாதனையை மேம்படுத்தியுள்ளது. அவர்கள் இதற்கு முன்பு 2018 இல் நேபாளத்திற்கு எதிராக 380 ரன்கள் எடுத்தனர். இப்போது தகுதிச் சுற்றில் முதல் 400+ ஸ்கோரைக் கொண்டு வந்துள்ளனர்.