யுஎஸ் ஓபன் கிராண்ட் ஸ்லாமில் முதல்முறையாக அரையிறுதிக்கு முன்னேறி யுகி பாம்ப்ரி சாதனை
செய்தி முன்னோட்டம்
இந்தியாவின் யுகி பாம்ப்ரி மற்றும் அவரது நியூசிலாந்து ஜோடி மைக்கேல் வீனஸ், யுஎஸ் ஓபன் 2025 போட்டியின் இரட்டையர் பிரிவில் அரையிறுதிக்கு முன்னேறி புதிய வரலாறு படைத்துள்ளனர். யுகி பாம்ப்ரியின் வாழ்க்கையில் ஒரு கிராண்ட் ஸ்லாம் தொடரின் அரையிறுதிக்கு முன்னேறியது இதுவே முதல்முறையாகும். இந்தத் தரவரிசை பெறாத ஜோடி, காலிறுதிப் போட்டியில் அனுபவமிக்க வீரர்களான நிகோலா மெக்டிக் மற்றும் ராஜீவ் ராம் ஜோடியை வீழ்த்தி ரசிகர்களை ஆச்சரியப்படுத்தினர். கோர்ட் 17 இல் நடைபெற்ற இந்த விறுவிறுப்பான போட்டியில், யுகி பாம்ப்ரி மற்றும் மைக்கேல் வீனஸ் ஜோடி 6-3, 7-6, 6-3 என்ற கணக்கில் வெற்றி பெற்றது.
வெற்றி
வெற்றி குறித்து யுகி பாம்ப்ரி பேச்சு
வெற்றிக்குப் பிறகு பேசிய யுகி பாம்ப்ரி, அனுபவமிக்க வீரர்களுக்கு எதிராக விளையாடுவது கடினமானது என்று ஒப்புக்கொண்டார். "இது மிகவும் பதற்றமான போட்டியாக இருந்தது. எங்கள் எதிராளிகள் மிகுந்த அனுபவம் வாய்ந்தவர்கள் என்பதால், போட்டியை எங்களுக்கு மிகவும் கடினமாக்கினர்." என்று அவர் கூறினார். மேலும், தனது ஜோடி மைக்கேல் வீனஸுடனான நீண்டகால நட்பைப் பற்றியும் அவர் நெகிழ்ச்சியுடன் பகிர்ந்து கொண்டார். "நாங்கள் 15 ஆண்டுகளுக்கும் மேலாக நண்பர்களாக இருக்கிறோம். இப்போது ஒன்றாக டென்னிஸ் விளையாடுவது சரியான தருணம் என்று உணர்ந்தோம்." என்று கூறினார். இந்த ஜோடி அரையிறுதியில் நீல் ஸ்குப்ஸ்கி மற்றும் ஜோ சாலிஸ்பரி ஜோடியை எதிர்கொள்ள உள்ளது.