சச்சின் டெண்டுல்கரின் காலில் விழுந்து கெஞ்சிய சோயிப் அக்தர் : சேவாக் பகிர்ந்த சுவாரஸ்ய சம்பவம்
முன்னாள் இந்திய தொடக்க ஆட்டக்காரர் வீரேந்திர சேவாக், சச்சின் டெண்டுல்கர் மற்றும் பாகிஸ்தான் முன்னாள் வேகப்பந்து வீச்சாளர் சோயிப் அக்தர் சம்பந்தப்பட்ட ஒரு வேடிக்கையான சம்பவத்தை நினைவு கூர்ந்தார். பாகிஸ்தான் அணி இந்தியாவில் சுற்றுப் பயணம் செய்தபோது லக்னோவில் இந்தியா மற்றும் பாகிஸ்தான் கிரிக்கெட் வீரர்களுக்காக ஒரு விருந்து ஏற்பாடு செய்யப்பட்டுள்ளது. இதில் போதை தலைக்கேறிய சோயிப் அக்தர் சச்சினை தூக்க முயற்சி செய்துள்ளார். ஆனால் முடியவில்லை. அப்போது இருவரும் கீழே விழுந்த நிலையில், அதைப் பார்த்த தன்னால் சிரிப்பை அடக்க முடியவில்லை என சேவாக் நியூஸ் 18 சௌபாலில் கூறினார்.
சோயிப் அக்தரை கலாய்த்து தள்ளிய வீரேந்திர சேவாக்
இந்த சம்பவம் அக்தரை மிகவும் சங்கடத்தில் ஆழ்த்திய நிலையில், அவரது கிரிக்கெட் வாழ்க்கை முடிந்து விட்டது என சேவாக் கிண்டல் செய்துள்ளார். சச்சின் போன்ற ஒரு ஜாம்பவானை காயப்படுத்திய நிலையில், சச்சின் பிசிசிஐ'யிடம் புகார் தெரிவிப்பார் என சேவாக் அக்தரை மிரட்டியுள்ளார். இதனால் பயந்துபோன அக்தர் சச்சின் செல்லும் இடமெல்லாம் பின்னாடியே சென்று அவரிடம் மன்னிப்பு கூறியதாகவும், காலில் விழுந்து கூட கெஞ்சினார் என்றும் சேவாக் கூறினார். மேலும் சச்சினுடன் எப்போது பேசினாலும், இதை நினைவுகூர்ந்து சிரித்து மகிழ்வோம் என கூறியுள்ளார். இந்தியா-பாகிஸ்தான் அணிகள் களத்தில் ஆக்ரோஷமாக செயல்பட்டாலும், மைதானத்திற்கு வெளியே எப்போதும் நல்ல உறவுகளை கொண்டிருக்கின்றனர்.
