WPL 2027 மினி ஏலம் கொச்சியில் இன்று தொடக்கம்: 146 வீராங்கனைகள் பங்கேற்பு
செய்தி முன்னோட்டம்
மகளிர் பிரீமியர் லீக் (WPL) கிரிக்கெட் தொடரின் 5-வது சீசனுக்கான மினி ஏலம் இன்று புதன்கிழமை கேரள மாநிலம் கொச்சியில் விறுவிறுப்பாகத் தொடங்குகிறது. வரும் 2027 ஜனவரி 14 முதல் பிப்ரவரி 7 வரை நடைபெறவுள்ள இந்த சீசனுக்காக, ஐந்து அணிகளிலும் காலியாக உள்ள 27 இடங்களை (20 இந்திய வீராங்கனைகள், 7 வெளிநாட்டு வீராங்கனைகள்) நிரப்புவதற்காக ஏலம் நடைபெறுகிறது. அணிகளிடம் ஒட்டுமொத்தமாக ₹8.15 கோடி ஏலத்தொகை மீதமுள்ள நிலையில், முக்கியமாக விக்கெட் கீப்பர்கள் மற்றும் ஃபினிஷர்களுக்கான தட்டுப்பாடு நிலவுவதால் அவர்களுக்குக் கடுமையான போட்டி நிலவும் என்று எதிர்பார்க்கப்படுகிறது.
அணிகளின் கையிருப்பு நிதி மற்றும் காலி இடங்களின் விவரம்
அணிகளின் கையிருப்பு நிதி மற்றும் காலி இடங்கள்
கடந்த சீசனில் பின்னடைவைச் சந்தித்த உ.பி வாரியர்ஸ் அணி, கிரண் நவகிரே, டியோட்டின், ஸ்வேதா செஹ்ராவத் ஆகியோரை விடுவித்துவிட்டு, அதிகபட்சமாக ₹3.75 கோடி தொகையுடனும் 8 காலி இடங்களுடனும் களமிறங்குகிறது.
தொடர்ந்து நான்கு முறை இறுதிப்போட்டி வரை சென்று ஏமாற்றமடைந்த டெல்லி கேபிடல்ஸ் அணி ₹1.10 கோடியுடன் 5 இடங்களை நிரப்பக் காத்திருக்கிறது.
தானியா பாட்டியா விடுவிக்கப்பட்டதால் அனுபவமிக்க இந்திய விக்கெட் கீப்பரைத் தேர்வு செய்வதில் டெல்லி தீவிரம் காட்டும்.
மும்பை இந்தியன்ஸ் அணி ₹90 லட்சம் இருப்புடன் 6 இடங்களுக்கும், நடப்பு சாம்பியனான ராயல் சேலஞ்சர்ஸ் பெங்களூரு அணி ₹1.15 கோடியுடன் 5 இடங்களுக்கும், குஜராத் ஜெயண்ட்ஸ் அணி ₹1.25 கோடியுடன் 3 இடங்களுக்கும் தேவையான வீராங்கனைகளைத் தேர்வு செய்யவுள்ளன.
வீராங்கனைகள்
முக்கிய நட்சத்திரங்கள்
இந்திய வீராங்கனைகளில் ₹40 லட்சம் அடிப்படை விலையுடன் களமிறங்கும் ஜி.கமலினி, பேட்டிங் மற்றும் விக்கெட் கீப்பிங் திறமையால் டெல்லி மற்றும் உ.பி அணிகளின் பிரதான தேர்வாக இருப்பார் எனக் கருதப்படுகிறது.
அவருடன் உமா சேத்ரி, தானியா பாட்டியா, ஆல்ரவுண்டர் சினே ராணா, விருந்தா தினேஷ், ஸ்வேதா செஹ்ராவத் மற்றும் வேகப்பந்து வீச்சாளர் ஷப்னம் ஷகீல் ஆகியோர் பெரும் எதிர்பார்ப்பை ஏற்படுத்தியுள்ளனர்.
ஆஸ்திரேலியாவின் சோஃபி மொலினக்ஸ், ஜெஸ் ஜோனாசென், கிரேஸ் ஹாரிஸ், சமரி அத்தபத்து மற்றும் சோபியா டங்க்லி ஆகியோர் முன்னணிப் பெயர்களாக உள்ளனர்.
மேலும், ஸ்காட்லாந்தின் சாரா பிரைஸ் அசோசியேட் விதியின் கீழ் ஐந்தாவது வெளிநாட்டு வீராங்கனையாகக் களமிறங்க முடியும் என்பதால், விக்கெட் கீப்பர் தேவைப்படும் அணிகளுக்கு அவர் சிறந்த தேர்வாக அமைவார்.
மினி ஏலம்
ஏலம் நடைபெறும் நடைமுறை
முதலில் சர்வதேச அனுபவம் கொண்ட 'கேப்டு' (Capped) வீராங்கனைகளான பேட்டர்கள், ஆல்ரவுண்டர்கள், சுழற்பந்து வீச்சாளர்கள், விக்கெட் கீப்பர்கள் மற்றும் வேகப்பந்து வீச்சாளர்கள் வரிசையாக ஏலம் விடப்படுவர்.
அதனைத் தொடர்ந்து 'அன்கேப்டு' இளம் வீராங்கனைகளுக்கான ஏலம் நடைபெறும்.
பின்னர் குறிப்பிட்ட எண்ணிக்கையிலான வீராங்கனைகளுக்குப் பிறகு ஏலம் வேகப்படுத்தப்பட்ட முறையில் முன்னெடுக்கப்பட்டு, அணிகளால் தேர்ந்தெடுக்கப்படும் விற்கப்படாத வீராங்கனைகளும் மீண்டும் ஏலத்திற்கு அழைக்கப்படுவர்.
மினி ஏலம் நிறைவடைந்ததும் அனைத்து அணிகளின் இறுதிப் பட்டியல் அதிகாரப்பூர்வமாக அறிவிக்கப்படவுள்ளது.