ஆர்சிபி ரசிகர்களின் புதிய 'பேவரைட்': யார் இந்த ஜேக்கப் டஃபி? முதல் போட்டியிலேயே மிரட்டிய நியூசிலாந்து புயல்
செய்தி முன்னோட்டம்
ஐபிஎல் 2026 தொடக்க ஆட்டத்தில் சன்ரைசர்ஸ் ஹைதராபாத் அணியின் அதிரடி பேட்டிங் வரிசையைத் தனது துல்லியமான பந்துவீச்சால் நிலைகுலையச் செய்தவர் ஜேக்கப் டஃபி. ஆர்சிபி அணியின் தூணாகக் கருதப்படும் ஜோஷ் ஹேசில்வுட் இல்லாத குறையைத் தனது அறிமுகப் போட்டியிலேயே போக்கியுள்ளார் இந்த 31 வயது நியூசிலாந்து வேகப்பந்து வீச்சாளர். சின்னசாமி மைதானத்தில் நான்கு ஓவர்களில் வெறும் 22 ரன்கள் மட்டுமே கொடுத்து 3 முக்கிய விக்கெட்டுகளைக் கைப்பற்றிய இவரது ஆட்டத்தைப் பார்த்து ஆர்சிபி ரசிகர்கள் உற்சாகத்தில் உள்ளனர்.
பின்னணி
யார் இந்த ஜேக்கப் டஃபி?
ஆகஸ்ட் 2, 1994இல் நியூசிலாந்தின் லம்ஸ்டன் பகுதியில் பிறந்த ஜேக்கப் டஃபி, ஒரு வலது கை வேகப்பந்து வீச்சாளர் ஆவார். நியூசிலாந்து உள்நாட்டு கிரிக்கெட்டில் ஓடாகோ அணிக்காக விளையாடி வரும் இவர், மிகவும் அனுபவம் வாய்ந்த வீரர். 2020 ஆம் ஆண்டு பாகிஸ்தானுக்கு எதிரான டி20 போட்டியில் சர்வதேச அளவில் அறிமுகமானார். தனது அறிமுக சர்வதேசப் போட்டியிலேயே 4 விக்கெட்டுகளைக் கைப்பற்றி 'ஆட்டநாயகன்' விருது வென்றது இவரது திறமைக்குச் சான்றாகும். இவரது சீரான வேகம் மற்றும் பந்தை இரண்டு பக்கமும் ஸ்விங் செய்யும் திறன் ஆர்சிபி அணிக்கு மிகப்பெரிய பலமாக அமைந்துள்ளது.
ஐபிஎல் 2026
ஐபிஎல் 2026 ஏலமும் ஆர்சிபி வாய்ப்பும்
ஐபிஎல் 2026 மெகா ஏலத்தில் ஜேக்கப் டஃபியை அவரது அடிப்படை விலையான ₹2 கோடிக்கு ஆர்சிபி நிர்வாகம் வாங்கியது. ஆரம்பத்தில் ஒரு மாற்று வீரராகவே இவர் பார்க்கப்பட்டார். ஆனால், ஹேசில்வுட் காயம் மற்றும் உடற்தகுதி காரணமாக முதல் போட்டியில் விளையாட முடியாத சூழல் ஏற்பட்டதால், டஃபிக்கு ஆடும் லெவனில் வாய்ப்பு கிடைத்தது. கிடைத்த வாய்ப்பைச் சரியாகப் பயன்படுத்திக் கொண்ட அவர், அபிஷேக் ஷர்மா, டிராவிஸ் ஹெட் மற்றும் நிதிஷ் ரெட்டி ஆகிய ஆபத்தான வீரர்களை வெளியேற்றி ஆட்டத்தின் போக்கை மாற்றினார்.
மாற்று
ஹேசில்வுட்டுக்கு சரியான மாற்றா?
ஆர்சிபி ரசிகர்கள் ஜேக்கப் டஃபியை "ஹேசில்வுட்டின் சரியான மாற்று" என்று சமூக வலைதளங்களில் புகழ்ந்து வருகின்றனர். பந்தை ஸ்டம்பிற்கு நேராக வீசுவது, சரியான லெந்த்தில் பந்துவீசி பேட்டர்களைத் திணறடிப்பது என ஹேசில்வுட் செய்யும் அதே வேலையைத் டஃபி கச்சிதமாகச் செய்கிறார். இன்றைய போட்டியின் ஆட்டநாயகன் விருதையும் வென்றுள்ள அவர், ஹேசில்வுட் அணிக்குத் திரும்பினாலும் தனக்கான இடத்தை தக்கவைக்கப் போராடுவார் என்பதில் சந்தேகமில்லை. ஆர்சிபி அணியின் பந்துவீச்சு பலவீனமாக இருப்பதாகக் கூறப்பட்ட விமர்சனங்களுக்கு டஃபி ஒரு முற்றுப்புள்ளி வைத்துள்ளார்.