ஐபிஎல் 2023 தோனியின் கடைசி சீசன் அல்ல : ரகசியத்தை போட்டுடைத்த 'சின்ன தல' ரெய்னா!
செய்தி முன்னோட்டம்
ஐபிஎல் 2023 தொடர் எம்எஸ் தோனியின் கடைசி ஐபிஎல் சீசனாக இருக்குமா என்ற கேள்வி இன்னும் நீடித்து வரும் நிலையில், சென்னை சூப்பர் கிங்ஸ் அணியின் முன்னாள் வீரர் சுரேஷ் ரெய்னா ரகசியத்தை போட்டுடைத்துள்ளார். இந்த ஐபிஎல்லுடன் தல தோனி ஓய்வு பெற்று விடுவார் என்பதே பலரது நம்பிக்கையாகவும் உள்ளது. ஆனால் தோனி இது குறித்து எந்த கருத்தும் வெளியிடாமலேயே இருந்து வந்தார். வர்ணனையாளர் டேனி மோரிசன் ஒருமுறை கடைசி சீசனை எப்படி அனுபவித்து விளையாடுகிறீர்கள் எனக் கேட்டபோது இது கடைசி சீசன் என தான் கூறவில்லை எனக்கூறினாலும் அடுத்தடுத்த சீசனில் விளையாடுவது குறித்தோ எதிர்கால திட்டங்கள் குறித்தோ வெளிப்படையாக எதுவும் கூறவில்லை. இதனால் ரசிகர்களிடையே தொடர்ந்து குழப்பம் நிலவி வருகிறது.
suresh raina reveals what dhoni said
தோனி ஓய்வு குறித்து பேசிய சுரேஷ் ரெய்னா
ஜியோ சினிமாவில் சுரேஷ் ரெய்னா பேசியபோது, நடந்து கொண்டிருக்கும் ஐபிஎல் சீசனின் சமீபத்திய சந்திப்பில் தோனி அவரிடம் ஓய்வு குறித்து எதுவும் சொன்னாரா என கேள்வி எழுப்பப்பட்டது. இதற்கு பதிலளித்த சின்ன தல என அழைக்கப்படும் சுரேஷ் ரெய்னா, "கோப்பையை வென்ற பிறகு, இன்னும் ஒரு வருடம் விளையாடுவேன்." என கூறியதாக தெரிவித்துள்ளார். இதனால் எம்எஸ் தோனி குறைந்தபட்சம் அடுத்த சீசனிலும் விளையாடுவார் என்பது உறுதியாகியுள்ளதால், கிரிக்கெட் ரசிகர்கள் மகிழ்ச்சி அடைந்துள்ளனர். இதற்கிடையே நடப்பு ஐபிஎல் சீசனில் பிளேஆஃப் சுற்று வாய்ப்பை சிஎஸ்கே கிட்டத்தட்ட உறுதி செய்துள்ள நிலையில், அந்த அணி பட்டத்தை வெல்லுமா இல்லையா என்பது வரும் வாரங்களில் தெளிவாகத் தெரியப் போகிறது.