'வயது ஒரு பொருட்டே அல்ல'; 2027 உலகக்கோப்பையில் ரோஹித்-விராட் விளையாடுவது குறித்து பிசிசிஐ தலைவர் முக்கிய தகவல்
செய்தி முன்னோட்டம்
வரும் 2027 ஆம் ஆண்டு நடைபெறவுள்ள ஒருநாள் உலகக்கோப்பைத் தொடரில் முன்னாள் கேப்டன்கள் விராட் கோலி மற்றும் ரோஹித் ஷர்மா ஆகியோர் விளையாடுவது குறித்து பிசிசிஐ தலைவர் மிதுன் மன்ஹாஸ் முக்கியத் தகவலை வெளியிட்டுள்ளார். இந்த தொடரில் இரு மூத்த வீரர்களின் பங்கேற்பிற்கு வயது எந்தவிதத்திலும் ஒரு தடையாக இருக்காது என்றும், அவர்கள் தொடர்ந்து உடற்தகுதியுடன் இருந்து சிறப்பாக விளையாடும் வரை அணிக்குத் தேர்ந்தெடுக்கப்படுவார்கள் என்றும் அவர் உறுதிபடத் தெரிவித்துள்ளார். இந்திய கிரிக்கெட் ரசிகர்களிடையே இந்த அறிவிப்பு பெரும் வரவேற்பைப் பெற்றுள்ளது. கூடுதல் விபரங்கள் இங்கே:-
அளவுகோல்
பிசிசிஐ தலைவரின் தெளிவானத் தகுதி அளவுகோல்
பிசிசிஐ தலைவர் மிதுன் மன்ஹாஸ் அளித்துள்ள பேட்டியில், "ஒரு வீரரின் தேர்வுக்கு உடற்தகுதியும் களத்தில் வெளிப்படுத்தும் செயல்பாடுகளும் மட்டுமே முக்கிய அளவுகோலாக இருக்க வேண்டும்.
நிச்சயமாக வயது அல்ல. நாட்டிற்காகப் போட்டிகளை வென்று தரும் திறனுடன் ஒருவர் இருக்கும் வரை, அதுவே முதன்மையானத் தகுதியாகும்." என்று கூறியுள்ளார்.
சமீபத்திய ஒருநாள் போட்டிகளில் விராட் கோலி 76.75 சராசரியுடனும், ரோஹித் ஷர்மா 77.80 சராசரியுடனும் அபாரமான ஃபார்மில் இருப்பது உலகக்கோப்பைத் தேர்வுக்கு வலுவான சான்றாக அமைகிறது.
இளம் கேப்டன்
இளம் கேப்டன் ஷுப்மன் கில்லுக்கு மூத்த வீரர்களின் ஆதரவு
இந்திய அணியின் புதிய கேப்டன் ஷுப்மன் கில்லுக்கு, ரோஹித் ஷர்மா மற்றும் விராட் கோலி போன்ற மூத்த வீரர்களின் இருப்பு மிகப்பெரிய பலமாக இருக்கும் என மன்ஹாஸ் தெரிவித்துள்ளார்.
ஐபிஎல் தொடரில் குஜராத் டைட்டன்ஸ் அணியை வழிநடத்திய அனுபவம் கில்லுக்கு உள்ளது.
அதோடு ரோஹித், கோலி, ஹர்திக் பாண்டியா மற்றும் பந்துவீச்சுப் பொறுப்பை ஏற்றுக்கொள்ளக் கூடிய ஜஸ்ப்ரீத் பும்ரா ஆகியோர் அருகில் இருப்பது கேப்டன்சியின் பணிச்சுமையை பகிர்ந்து கொள்ள உதவும் என்றும் அவர் சுட்டிக்காட்டியுள்ளார்.
இந்திய அணி
இந்திய அணியின் அடுத்தகட்ட உலகக்கோப்பை தயாரிப்புகள்
இந்திய கிரிக்கெட் அணி தனது அடுத்தகட்ட உலகக்கோப்பைத் தயாரிப்புகளை தீவிரமாக முன்னெடுத்து வருகிறது.
நியூசிலாந்து சுற்றுப்பயணத்தைத் தொடர்ந்து பல்வேறு ஒருநாள் தொடர்களில் இந்திய அணி பங்கேற்கவுள்ளது.
கேப்டன் ஷுப்மன் கில் தலைமையில் அனுபவமும் இளமையும் கலந்த வலுவான அணியை உருவாக்கும் முயற்சியில் பிசிசிஐ ஈடுபட்டுள்ளது.
விராட் கோலி மற்றும் ரோஹித் ஷர்மாவின் தொடர்ச்சியான சிறப்பான ஆட்டம், 2027 உலகக்கோப்பையை வெல்லும் இந்திய அணியின் கனவுக்கு பெரும் ஊக்கமளிப்பதாக அமைந்துள்ளது.