15 வயதில் சாதனை: ஆடவர் டி20 கிரிக்கெட் வரலாற்றில் இளம் கேப்டனான வைபவ் சூர்யவன்ஷ

எழுதியவர் Vasuki

Nov 14, 2026

04:56 pm

செய்தி முன்னோட்டம்

இந்திய கிரிக்கெட்டின் இளம் புயல் வைபவ் சூர்யவன்ஷி, இன்று (நவம்பர் 14) இந்துர் ஹோல்கர் மைதானத்தில் நடைபெற்ற சையத் முஷ்டாக் அலி கோப்பை (Syed Mushtaq Ali Trophy) டி20 தொடரின் முதல் போட்டியில் பீகார் அணியின் கேப்டனாகக் களமிறங்கியதன் மூலம், ஆடவர் டி20 கிரிக்கெட் வரலாற்றிலேயே மிக இளம் வயதில் கேப்டன் பொறுப்பேற்ற வீரர் என்ற இமாலய உலக சாதனையைப் படைத்துள்ளார். 15 வயது மற்றும் 232 நாட்களே ஆன நிலையில் இந்தச் சாதனையை நிகழ்த்தியுள்ள சூர்யவன்ஷி, இதற்கு முன்பு குரோஷியா தேசிய அணியை 17 வயது மற்றும் 311 நாட்களில் வழிநடத்தி சாதனை படைத்திருந்த சாக் வுகுசிக்கின் உலக சாதனையைத் தகர்த்தெறிந்துள்ளார்

சூர்யவன்ஷியின் ஆட்டம்

சவுராஷ்டிராவுக்கு எதிரான போட்டி

சவுராஷ்டிரா அணிக்கு எதிரான இன்றைய தொடக்க ஆட்டத்தில் டாஸ் வென்று பேட்டிங்கைத் தேர்வு செய்த பீகார் அணியின் தொடக்க ஆட்டக்காரராகக் களமிறங்கிய இடதுகை பேட்டரான வைபவ் சூர்யவன்ஷி, 12 பந்துகளில் 2 பவுண்டரிகள் மற்றும் ஒரு சிக்சருடன் 18 ரன்கள் எடுத்து சேத்தன் சகாரியா பந்துவீச்சில் ஆட்டமிழந்தார்.

முதலில் பேட்டிங் செய்த பீகார் அணி நிர்ணயிக்கப்பட்ட 20 ஓவர்களில் 9 விக்கெட் இழப்பிற்கு 137 ரன்கள் எடுத்த நிலையில், தொடர்ந்து களமிறங்கிய ஜெய்தேவ் உனத்கட் தலைமையிலான சவுராஷ்டிரா அணி 16.3 ஓவர்களில் 5 விக்கெட்டுகளை இழந்து இலக்கை எட்டி 5 விக்கெட் வித்தியாசத்தில் வெற்றி பெற்றது.

சாதனை முறியடிப்பு

சச்சின் சாதனை முறியடிப்பு முதல் ஐபிஎல் ஆரஞ்சு தொப்பி வரை

கடந்த ஆண்டு ஐபிஎல் தொடரில் 35 பந்துகளில் சதம் அடித்த வைபவ் சூர்யவன்ஷி, தொடர்ந்து சாதனைகள் படைத்து வருகிறார்.

கடந்த ஜூலை மாதம் இங்கிலாந்துக்கு எதிரான டி20 போட்டியில் 15 வயது 99 நாட்களில் களமிறங்கியதன் மூலம், சச்சின் டெண்டுல்கரின் சாதனையை முறியடித்து சர்வதேச கிரிக்கெட்டில் அறிமுகமான மிக இளம் வயது இந்திய வீரரானார்.

இதுவரை 10 சர்வதேச டி20 போட்டிகளில் 2 அரைசதங்களுடன் 295 ரன்கள் எடுத்துள்ளார்.

மேலும், ஐபிஎல் 2026 சீசனில் 237-க்கும் அதிகமான ஸ்ட்ரைக் ரேட்டில் 776 ரன்களும், 72 சிக்சர்களும் விளாசி ஆரஞ்சு தொப்பியை வென்று அசத்தினார்.