Sports Round Up : இன்றைய முக்கிய விளையாட்டுச் செய்திகள்
செய்தி முன்னோட்டம்
2023 ஒருநாள் உலகக்கோப்பை இறுதிப் போட்டியைத் தொடர்ந்து, இந்தியா மற்றும் ஆஸ்திரேலியா ஆகிய இரு அணிகளும், ஐந்து போட்டிகள் கொண்ட டி20 தொடரில் விளையாடி வருகின்றன.
இரு அணிகளும் பங்கேற்கும் முதல் போட்டியானது விசாகப்பட்டினத்தில் நேற்று நடைபெற்றது. சூர்யகுமார் யாதவ் தலைமையில் களமிறங்கிய இளம் இந்திய அணியானது, இறுதிப் பந்து வரை விருவிருப்பாகச் சென்ற போட்டியில், ஆஸ்திரேலியாவை வீழ்த்தி முதல் வெற்றியைப் பதிவு செய்திருக்கிறது.
முதலில் பேட்டிங் செய்த ஆஸ்திரேலியா அணி 20 ஓவர்களில் 3 விக்கெட்டுகள் இழப்பிற்கு 208 ரன்களைக் குவித்தது. 209 ரன்களை என்ற இமாலய இலக்கை நோக்கிப் பயணித்த இந்திய அணியானது, கேப்டன் சூர்யகுமார் யாதவ்வின் சிறப்பான ஆட்டத்தால் வெற்றி தனதாக்கியது.
கிரிக்கெட்
இந்திய கிரிக்கெட் அணியின் பயிற்சியாளராகும் விவிஎஸ் லட்சுமணன்?
கடந்த நவம்பர் 19ம் தேதி முடிவடைந்த உலகக்கோப்பை கிரிக்கெட் இறுதிப் போட்டியுடன், இந்தியாவின் தலைமைப் பயிற்சியாளராக செயல்பட்டு வந்த ராகுல் டிராவிட்டின் பதவிக்காலமும் நிறைவடைந்திருக்கிறது.
அடுத்ததாக யார் பயிற்சியாளராகச் செயல்படவிருக்கிறார் என்ற கேள்வி கடந்த சில நாட்களாகவே கேட்கப்பட்டு வந்த நிலையில், முன்னாள் இந்திய வீரர் விவிஎஸ் லட்சுமணன் இந்திய கிரிக்கெட் அணியின் புதிய பயிற்சியாளராக நியமிக்கப்படலாம் எனத் தகவல் வெளியாகியிருக்கிறது.
ராகுல் டிராவிட்டின் பதவிக்காலத்திலேயே, அவர் இல்லாத சமயங்களில் இந்திய அணியின் பயிற்சியாளராக விவிஎஸ் லட்சுமணன் செயல்பட்டு வந்திருக்கிறார். அயர்லாந்துக்கு எதிரான டி20 தொடரில் ஹர்திக் பாண்டியாவுடன் இணைந்து இந்திய அணியின வெற்றிக்கு வித்திட்டிருக்கிறார்.
தற்போது ஆஸ்திரேலியாவுடான ஐந்து போட்டிகள் கொண்ட டி20 தொடரிலும் அவரே பயிற்சியாளராகச் செயல்பட்டு வருவது குறிப்பிடத்தக்கது.
பாட்மின்டன்
சீனாவில் நடைபெற்று வரும் பாட்மின்டன் தொடரில் முன்னேறும் இந்திய வீரர்கள்:
சீனா நடைபெற்று வரும் 'மாஸ்டர்ஸ் சூப்பர் 750' பாட்மின்டர் தொடரில் லக்ஷயா சென் மற்றும் கிடாம்பி ஸ்ரீநாத் உள்ளிட்ட இந்திய பாட்மின்டன் வீரர்கள் தொடக்க சுற்றிலேயே வெளியேறி அதிர்ச்சியளித்தனர்.
ஆனால், இந்தத் தொடரின் இரட்டையர் ஆடவர் பிரிவில் விளையாடி வரும் இந்திய வீரர்களான சாத்விக் சாய்ராஜ் ராங்கிரெட்டி மற்றும் சிராக் ஷெட்டி இணையானது, தங்களை எதிர்த்துப் போட்டியிட்ட ஜப்பானைச் சேர்ந்த அகிரா கோகா மற்றும் டாய்ச்சி சைட்டோ இணைய வீழ்த்தி காலிறுதிக்கு முன்னேறியிருக்கிறது.
21-15, 21-16 என்ற நேர்செட் கணக்கில் ஜப்பானிய இணையை வீழ்த்தியிருக்கிறது இந்திய இணை. அதேபோல், ஆண்கள் ஒற்றையர் பிரிவிலும் இந்திய வீரர் HS பிரணாயும் இத்தொடரின் காலிறிச்சுற்றுக்கு முன்னேறியிருப்பது குறிப்பிடத்தக்கது.
ஐபிஎல்
2024 ஐபிஎல்லில் இருந்தும் விலகிய பென் ஸ்டோக்ஸ்?
கடந்த ஐபிஎல் ஏலத்தில் இங்கிலாந்து வீரர் பென் ஸ்டோக்ஸை 16.25 கோடி ரூபாய்க்கு ஏலம் எடுத்தது சென்னை சூப்பர் கிங்ஸ் அணி. ஆனால், முட்டிக்கால் காயம் காரணமாக வெறும் இரண்டு போட்டிகளில் மட்டுமே விளையாடியிருந்தார் அவர்.
இந்நிலையில், இந்த ஆண்டும் தனது வேலைப்பழு மற்றும் ஃபிட்னஸ் கருதி ஐபிஎல்லில் பங்கெடுக்காமல் இருக்க அவர் முடிவெடுத்திருப்பதாகத் தெரிவிக்கப்பட்டுள்ளது. இதனை சென்னை சூப்பர் கிங்ஸ் அணி நிர்வாகமே அதிகாரப்பூர்வமாக அறிவித்திருக்கிறது.
கடந்த சில நாட்களுக்கு முன்பு நடைபெற்று முடிந்த 2023 ஒருநாள் கிரிக்கெட் உலகக்கோப்பைத் தொடரின் பிற்பாதியில் கலந்து கொண்டிருந்தார் பென் ஸ்டோக்ஸ். சர்வதேச ஒருநாள் போட்டிகளில் ஓய்வை அறிவித்துவிட்ட அவர், உலகக்கோப்பை தொடரில் கலந்து கொள்வதற்காக ஓய்வில் இருந்து வெளியே வந்தது குறிப்பிடத்தக்கது.
விஜய் ஹசாரே கோப்பை
விஜய் ஹசாரே கோப்பைத் தொடர்: முதல் நாள் முடிவுகள்
இந்தியாவின் உள்ளூர் ஒருநாள் கிரிக்கெட் தொடரான விஜய் ஹசாரே கோப்பைத் தொடர் நேற்று தொடங்கியது. முதல் நாளில் நடைபெற்ற 18 போட்டிகளில் 36 அணிகள் விளையாடியிருக்கின்றன.
முதல் நாள் போட்டியில், மும்பை, கேரளா, புதுச்சேரி, சர்வீசஸ், பரோடா, சண்டிகர், ராஜஸ்தான், ஒடிசா, விதர்பா, ஜார்கண்ட், ஹரியானா, மத்திய பிரதேசம், குஜராத், ஹிமாச்சல பிரதேசம், கர்நாடகா, பெங்கால், ஹைதராபாத் மற்றும் டெல்லி ஆகிய 18 அணிகளும் தங்களை எதிர்த்து போட்டியிட்ட அணியினை வென்று வெற்றி வாகை சூடியிருக்கின்றன.
முதல் நாளில் தமிழ்நாடு அணிக்கு போட்டிகள் இல்லாத நிலையில், நாளை (நவம்பர் 25) நடைபெறவிருக்கும் தங்களுடைய முதல் போட்டியில் கோவா அணியை எதிர்கொள்கிறது தமிழ்நாடு.