"தோனி ஓய்வு பெற்றதால் தான் ரிஷப் பந்த் சிறந்து விளங்கினார்" : சவுரவ் கங்குலி
டெல்லி கேப்பிடல்ஸ் பேட்டிங் வரிசையில் அக்சர் படேலை டாப் ஆர்டரில் களமிறக்குவது குறித்து நிர்வாகம் தீவிரமாக பரிசீலித்து வருகிறது என அணியின் இயக்குனர் சவுரவ் கங்குலி செவ்வாய்க்கிழமை (ஏப்ரல் 4) குஜராத் டைட்டன்ஸ் அணிக்கு எதிரான ஐபிஎல் போட்டிக்கு முன்னதாக செய்தியாளர்களுக்கு அளித்த பேட்டியில் தெரிவித்தார். மேலும் லக்னோ அணிக்கு எதிரான போட்டியில், வேகப்பந்து வீச்சின்போது சொதப்பிய பிரித்வி ஷாவிடம் கங்குலி கடுமை காட்டாமல், "எல்லோரும் வேகப்பந்து வீச்சு விளையாட கற்றுக் கொள்ள வேண்டும். வாழ்நாள் முழுவதும் வேகப்பந்து வீச்சில் விளையாடிய மிட்செல் மார்ஷ் கூட சீக்கிரமே அவுட் ஆனார்." என்று கூறினார்.
ரிஷப் பந்த் இல்லாதது பேரிழப்பு எனக் கூறிய கங்குலி
ரிஷப் பந்த் இல்லாத நிலையில் சர்ஃபராஸ் கான் அணியில் விக்கெட் கீப்பராக செயல்படுகிறார். இந்நிலையில், ஐபிஎல் சீசன் முழுவதும் அவர் விக்கெட் கீப்பராக இருப்பாரா என கேட்டதற்கு கங்குலி, "நீங்கள் கேட்டது நல்ல கேள்வி, நாளை பார்க்கலாம்" என்று மழுப்பினார். சர்ஃபராஸ் கான் வெறும் 20 ஓவர் மட்டுமே விக்கெட் கீப்பராக செயல்பட்ட நிலையில், அதைவைத்து எடை போட முடியாது என்பதால், அவருக்கு கூடுதல் வாய்ப்புகளை வழங்க கங்குலி விரும்புவதாகத் தெரிகிறது. மேலும் தோனி வெளியேறிய பிறகு தான் ரிஷப் பந்த் தனது திறமையை மெருகூட்ட முடிந்தது என்பதை சுட்டிக்காட்டி, தற்போதுள்ள இளம் வீரர்களும் வாய்ப்பு கிடைக்கும்போது தங்களை மேம்படுத்திக் கொள்வார்கள் என்றார்.
