கிரிக்கெட்டிலும் வருகிறது ரெட் கார்ட் விதி; கரீபியன் பிரீமியர் லீக்கில் அறிமுகம்
செய்தி முன்னோட்டம்
கால்பந்து விளையாட்டில் அதிகம் பயன்படுத்தப்படும் ரெட் கார்டு விதி, தற்போது முதல்முறையாக கிரிக்கெட்டிலும் அறிமுகமாக உள்ளது.
வெஸ்ட் இண்டீஸில் நடக்க உள்ள 2023 கரீபியன் பிரீமியர் லீக்கில் இந்த விதி முதன்முதலில் பயன்படுத்தப்பட உள்ளது.
இது மெதுவாக பந்துவீசும் சிக்கலை எதிர்கொள்வதற்காக கொண்டுவரப்பட்டுள்ளது. டி20 கிரிக்கெட்டைப் பொறுத்தவரை பல நேரங்களில் போட்டிக்கான நேரத்தை விட கூடுதல் நேரம் எடுத்துக் கொள்ளப்படுகிறது.
இந்த பிரச்சினையை சரிசெய்ய ஐசிசி பல நடவடிக்கைகளை எடுத்து வரும் நிலையில், தற்போது கரீபியன் லீக் கிரிக்கெட்டில் ஆடவர் மற்றும் மகளிர் பிரிவில் ரெட் கார்ட் விதியை கொண்டுவர திட்டமிட்டுள்ளது.
இதன்படி, மைதானத்தில் பந்துவீசும் அணிக்கு அவ்வப்போது போட்டியில் முடிந்துள்ள நேரம் குறித்து தெரிவிக்கப்படும்.
new rules for slow over rate in cpl 2023
கடைசி நான்கு ஓவர்களில் புதிய கட்டுப்பாடுகள் அமல்
புதிய விதிகளின்படி, 17வது ஓவரை 72 நிமிடங்கள் மற்றும் 15 வினாடிகளுக்குள் முடிக்கவில்லை என்றால், பந்துவீச்சு அணி ஒரு கூடுதல் பீல்டரை 30 யார்டு வட்டத்திற்குள் கொண்டு வர வேண்டும்.
18வது ஓவரை 76 நிமிடங்கள் மற்றும் 30 வினாடிகளுக்குள் முடிக்கவில்லை என்றால், பந்துவீச்சு அணி 30 யார்டு வட்டத்திற்குள் இரண்டு கூடுதல் பீல்டர்களை கொண்டு வர வேண்டும்.
19வது ஓவரை 80 நிமிடங்கள் மற்றும் 45 வினாடிகளில் முடிக்கவில்லை என்றால், 20வது ஓவர் தொடங்கும் முன் பீல்டிங் பக்கத்திலிருந்து ஒரு பீல்டர் வெளியேற்றப்படுவார்.
மேலும் ஆறு வீரர்கள் 30 யார்டு வட்டத்திற்குள் தொடர்ந்து இருப்பார்கள். எனினும், பந்துவீச்சு அணிக்கு காயங்கள், டிஆர்எஸ் சமயத்திற்கு தேவையான கால அவகாசம் வழங்கப்படும்.