15 ஆண்டுகளுக்குப் பின் அரிய டி20 சாதனை: ஸ்ரீசாந்த், அஸ்வின் பட்டியலில் இணைந்த பிரின்ஸ் யாதவ்
செய்தி முன்னோட்டம்
இந்திய அணியின் பின்வரிசை வீரர் பிரின்ஸ் யாதவ், சர்வதேச டி20 போட்டியில் 15 ஆண்டுகளுக்குப் பிறகு நிகழ்ந்த அரிய பேட்டிங் சாதனைப் பட்டியலில் இணைந்துள்ளார். இந்தூர் ஹோல்கர் மைதானத்தில் வெஸ்ட் இண்டீஸுக்கு எதிராக நடைபெற்ற 3-வது டி20 போட்டியில், இந்திய அணிக்காக 10 அல்லது 11-வது வரிசையில் களமிறங்கி ஒரே இன்னிங்ஸில் 3 பவுண்டரிகளை விரட்டிய மூன்றாவது இந்திய வீரர் என்ற பெருமையை அவர் பெற்றுள்ளார். இதற்கு முன்பு 2007-ல் எஸ். ஸ்ரீசாந்த் 4 பவுண்டரிகளும், 2011-ல் ரவிச்சந்திரன் அஸ்வின் 3 பவுண்டரிகளும் அடித்திருந்த நிலையில், இப்பட்டியலில் தற்போது பிரின்ஸ் யாதவ் இணைந்துள்ளார்.
கடைசி ஓவரில் வாணவேடிக்கை
14 ரன்கள் வித்தியாசத்தில் இந்தியா திரில் வெற்றி
இந்திய அணி 202/8 என சரிவைச் சந்தித்தபோது களமிறங்கிய பிரின்ஸ் யாதவ், ஷமர் ஜோசப் வீசிய இறுதி ஓவரில் 3 பவுண்டரிகளை விளாசி அணியின் ஸ்கோரை 223 ரன்களுக்கு உயர்த்தினார்.
முன்னதாக அதிரடி காட்டிய அபிஷேக் சர்மா 69 ரன்களும், இஷான் கிஷன் 37 ரன்களும் எடுத்திருந்தனர்.
தொடர்ந்து 224 ரன்கள் இலக்கை நோக்கி ஆடிய வெஸ்ட் இண்டீஸ் அணியை அர்ஷ்தீப் சிங் (3 விக்கெட்டுகள்), நமன் திர் (2 விக்கெட்டுகள்) கட்டுப்படுத்தினர்.
இதனால் 209 ரன்கள் மட்டுமே எடுத்த வெஸ்ட் இண்டீஸை 14 ரன்கள் வித்தியாசத்தில் வீழ்த்திய இந்திய அணி, டி20 தொடரில் 2-1 என முன்னிலை பெற்றது.