PAKvsAFG ஒருநாள் உலகக்கோப்பை : ஆப்கானிஸ்தான் அணிக்கு 283 ரன்கள் இலக்கு
செய்தி முன்னோட்டம்
ஒருநாள் உலகக்கோப்பை 2023 தொடரில் திங்கட்கிழமை (அக்டோபர் 23) நடைபெற்ற லீக் ஆட்டத்தில் ஆப்கான் கிரிக்கெட் அணிக்கு பாகிஸ்தான் 283 ரன்களை வெற்றி இலக்காக நிர்ணயம் செய்துள்ளது.
முன்னதாக, போட்டியில் டாஸ் வென்ற பாகிஸ்தான் முதலில் பேட்டிங் செய்ய முடிவெடுத்து களமிறங்கியது.
அந்த அணியின் தொடக்க ஆட்டக்காரர்கள் இருவரும் நிதானமான ஆட்டத்தை வெளிப்படுத்திய நிலையில், இமாம்-உல்-ஹக் 17 ரன்கள் எடுத்த நிலையில் வெளியேறினார்.
அவரைத் தொடர்ந்து களமிறங்கிய கேப்டன் பாபர் அசாம் தொடக்க ஆட்டக்காரர் அப்துல்லா சபீக்குடன் கூட்டணி சேர்ந்து அணியின் ஸ்கோரை உயர்த்தினார்.
அப்துல்லா சபீக் அரைசதம் கடந்து சிறப்பாக ஆடிவந்த நிலையில், 58 ரன்கள் எடுத்திருந்தபோது நூர் அகமது வீசிய பந்தில் எல்பிடபிள்யூ ஆகி வெளியேறினார்.
Afghanistan need 283 runs to win
பாபர் அசாம் அரைசதம்
பாகிஸ்தான் கிரிக்கெட் அணியின் கேப்டன் பாபர் அசாம் அரைசதம் கடந்து ஆடிய நிலையில், 74 ரன்கள் எடுத்திருந்தபோது நூர் அகமது வீசிய பந்தில் முகமது நபியிடம் கேட்ச் கொடுத்து அவுட்டானார்.
அவரைத் தொடர்ந்து வந்தவர்கள் சொற்ப ரன்களில் வெளியேற பாகிஸ்தான் நிலை பரிதாபமானது.
எனினும் லோயர் ஆர்டரில் களமிறங்கிய சதாப் கான் மற்றும் இப்திகார் அகமது தலா 40 ரன்கள் எடுத்து அணியின் ஸ்கோரை சற்று உயர்த்தினர்.
இதன் மூலம் பாகிஸ்தான் அணி 50 ஓவர்கள் முடிவில் 7 விக்கெட் இழப்பிற்கு 282 ரன்கள் எடுத்தது.
ஆப்கானிஸ்தான் அணியில் சிறப்பாக பந்துவீசிய நூர் அகமது 3 விக்கெட்டையும், நவீன்-உல்-ஹக் 2 விக்கெட்டையும் எடுத்தனர்.