சிஎஸ்கேயில் எம்எஸ் தோனியின் அடுத்த வாரிசு யார்? பயிற்சியாளர் ஃப்ளெமிங் பதில் இதுதான்
செய்தி முன்னோட்டம்
ஐபிஎல் 2024 சீசனுக்கு சென்னை சூப்பர் கிங்ஸ் அணி தயாராகி வரும் நிலையில், எம்எஸ் தோனியின் வாரிசு யார் என்ற கேள்விக்கு இன்னும் விடை கிடைக்காமல் புதிராகவே உள்ளது.
ரவீந்திர ஜடேஜா 2022இல் தோனியின் வாரிசாக சென்னை சூப்பர் கிங்ஸ் அணியின் கேப்டனாக தேர்வு செய்யப்பட்டார்.
ஆனால் ஜடேஜா தலைமையில் அணி தொடர்ந்து தோல்வியைத் தழுவியதால், அவர் பாதியிலேயே கேப்டன் பொறுப்பை கைவிட்டதோடு, அந்த தொடரில் இருந்தும் விலகினார்.
இதனால், தொடரின் மத்தியில் மீண்டும் கேப்டன் பொறுப்பேற்ற தோனி, 2023 சீசனிலும் கேப்டனாக இருந்து அணிக்கு ஐந்தாவது பட்டத்தை வென்று கொடுத்தார்.
இந்நிலையில், அணியின் கேப்டனாக ஜடேஜா திரும்புவது சாத்தியமில்லை என்றாலும், புதிய கேப்டனுக்கான வேட்டை தொடர்கிறது.
Stephen Fleming answers MS Dhoni's Succession Plan
பயிற்சியாளர் ஸ்டீபன் ஃப்ளெமிங் கருத்து
ஐபிஎல் 2024 ஏலத்திற்காக துபாய் சென்றிருந்த சென்னை சூப்பர் கிங்ஸ் அணியின் தலைமை பயிற்சியாளர் ஸ்டீபன் ஃப்ளெமிங்கிடம் எம்எஸ் தோனிக்கான வாரிசு திட்டம் குறித்து கேட்கப்பட்டதற்கு, அவர் எதிர்பாராத பதிலை அளித்தார்.
துபாயில் நடந்த ஏலத்தில் நடந்த செய்தியாளர் சந்திப்பின் போது, கடந்த 10 ஆண்டுகளாக தோனிக்காக சென்னை சூப்பர் கிங்ஸ் வாரிசு திட்டங்களை வைத்திருந்ததாகவும், ஆனால் அவர் எப்போதும் இல்லாத அளவுக்கு உற்சாகத்துடன் அணியை வழிநடத்தி வருவதாகவும் ஃப்ளெமிங் கூறினார்.
ஃப்ளெமிங் வெளிப்படையாக எதையும் கூறாத நிலையில், தோனி இந்த சீசனில் விளையாடுவது ஏற்கனவே உறுதியாகிவிட்ட ஒன்றாக உள்ளது.
இதனால் இந்த சீசனுக்கு பிறகே தோனியின் வாரிசு குறித்து அறிவிக்கப்படும் எனத் தெரிகிறது.