தோனிக்கு பதிலாக விக்கெட் கீப்பராக டெவான் கான்வே? சிஎஸ்கே அணியில் அதிரடி மாற்றம்
வெள்ளிக்கிழமை (ஏப்ரல் 21) சேப்பாக்கத்தில் நடைபெறும் முக்கியமான ஐபிஎல் 2023 மோதலில் சென்னை சூப்பர் கிங்ஸ் (சிஎஸ்கே) சன்ரைசர்ஸ் ஹைதராபாத் (எஸ்ஆர்எச்) அணியை எதிர்கொள்கிறது. நடப்பு ஐபிஎல்லில் சென்னை சூப்பர் கிங்ஸ் இதுவரை 5 போட்டிகளில் விளையாடி 3 வெற்றி மற்றும் 2 தோல்விகளுடன் புள்ளிப்பட்டியலில் மூன்றாம் இடத்தில் உள்ளது. மறுபுறம் சன்ரைசர்ஸ் ஹைதராபாத் இதுவரை 5 போட்டிகளில் 2 வெற்றி மற்றும் 3 தோல்விகளுடன் புள்ளிப்பட்டியலில் கடைசிக்கு முந்தைய இடத்தில் உள்ளது. போட்டி சென்னை சேப்பாக்கம் மைதானத்தில் நடக்க உள்ளதால், இதில் வெற்றி பெற்று முதலிரண்டு இடங்களுக்குள் முன்னேற சிஎஸ்கே முனைப்புடன் உள்ளது.
காயத்திலிருந்து எம்எஸ் தோனி மீண்டு விட்டாரா?
எம்எஸ் தோனிக்கு கால் வலி இன்னும் சரியாகவில்லை எனக் கூறப்படும் நிலையில், அவர் சன்ரைசர்ஸ் அணிக்கு எதிரான போட்டியில் இம்பாக்ட் பிளேயராக களமிறங்கி பேட்டிங் மட்டும் செய்வார் என கூறப்படுகிறது. டெவான் கான்வே விக்கெட் கீப்பிங் பயிற்சியில் ஈடுபடும் காணொளிகள் வெளியாகி இதை கிட்டத்தட்ட உறுதிப்படுத்தியுள்ள நிலையில், தோனிக்கு பதிலாக ருதுராஜ் கெய்க்வாட், ஜடேஜா அல்லது ரஹானே ஆகியோரில் ஒருவர் கேப்டன்சி பொறுப்பை ஏற்பார்கள் எனத் தெரிகிறது. எனினும் பென் ஸ்டோக்ஸ் மீண்டும் அணிக்கு திரும்புகிறார் எனக் கூறப்படுவது அணிக்கு கூடுதல் பலத்தை வழங்குகிறது.
