கிளென் மெக்ஸ்வெல்லின் சாதனைக்கு காரணம் எம்எஸ் தோனியா? வைரலாகும் எக்ஸ் பதிவு
செவ்வாயன்று (நவ.7) ஆஸ்திரேலிய கிரிக்கெட் அணி ஆல் ரவுண்டர் கிளென் மேக்ஸ்வெல் ஆட்டமிழக்காமல் இரட்டைச் சதம் அடித்து தனியொருவராக அணிக்கு வெற்றியை பெற்றுக் கொடுத்தார். இருப்பினும், இந்திய கிரிக்கெட் ஜாம்பவான் எம்எஸ் தோனியுடன் மேக்ஸ்வெல்லின் தொடர்பின் காரணமாகவே இது சாத்தியமாகியுள்ளது எக்ஸ் தளத்தில் ஒரு பதிவு வைரலாகி வருகிறது. முன்னதாக, ஆப்கானிஸ்தான் நிர்ணயித்த 292 ரன்கள் இலக்கை சேஸ் செய்யத் தொடங்கிய ஆஸ்திரேலிய அணி அடுத்தடுத்து விக்கெட்டுகளை இழந்ததால், 91 ரன்களுக்கு 7 விக்கெட்டுகளை இழந்து தடுமாறியது. அப்போது ஒரு முனையில் பாட் கம்மின்ஸ் நிலைத்து நிற்க, மறுமுனையில் கிளென் மேக்ஸ்வெல் அதிரடியாக விளையாடி 201 ரன்கள் எடுத்தார். இதன் மூலம் ஆஸ்திரேலியா இறுதியில் 3 விக்கெட் வித்தியாசத்தில் வெற்றி பெற்றது.
கிளென் மெக்ஸ்வெல்லின் இரட்டை சதத்திற்கு தோனி தான் காரணம் எனக் கூறிய ரசிகர்
மிகவும் இக்கட்டான கட்டத்தில், உறுதியுடன் நின்று போராடி கிளென் மேக்ஸ்வெல் சாதனை படைத்த நிலையில், எம்எஸ் தோனி ரசிகர் ஒருவர் இதற்கு தோனி தான் காரணம் என எக்ஸ் பக்கத்தில் பதிவிட்டுள்ளார். இது குறித்து அவர் வெளியிட்டுள்ள பதிவில், "உங்கள் வாழ்க்கைத்துணை தலயின் குகையிலிருந்து (சென்னை) வந்ததால், நீங்கள் இந்த மகத்தான சாதனையை படைத்துள்ளார். இந்த அற்புதமான ஆட்டத்திற்காக தலக்கு வாழ்த்துக்கள்" என பதிவிட்டுள்ளார். மேலும் இந்த பதிவுடன் கிளென் மேக்ஸ்வெல் மற்றும் தமிழகத்தைச் சேர்ந்த அவரது மனைவி வினி ராமன் படங்களையும் இணைத்துள்ளார். இது ஒருபுறம் சிரிப்பலையை ஏற்படுத்தினாலும், சிறந்த ஃபினிஷர் யார் என்பதில் தோனி மற்றும் மேக்ஸ்வெல்லை வைத்து ஒப்பீடுகளும் சூடு பிடித்துள்ளன.