நடுவே புகுந்து மிரட்டிய ஜடேஜா.. விடாமல் துரத்திய குல்தீப்! RR vs DC போட்டியின் வைரல் மொமெண்ட்
செய்தி முன்னோட்டம்
ஜெய்ப்பூரில் நடைபெற்ற ராஜஸ்தான் ராயல்ஸ் மற்றும் டெல்லி கேப்பிடல்ஸ் இடையிலான பரபரப்பான ஐபிஎல் 2026 போட்டி, வெறும் ரன் வேட்டையாக மட்டும் அமையாமல், ரசிகர்களுக்கு சில நெகிழ்ச்சியான மற்றும் வேடிக்கையான தருணங்களையும் வழங்கியது. குறிப்பாக, இந்திய அணியின் நட்சத்திர வீரர்களான ரவீந்திர ஜடேஜா மற்றும் குல்தீப் யாதவ் மைதானத்தில் ஒருவரையொருவர் கிண்டல் செய்துகொண்ட வீடியோ, தற்போது இணையத்தில் தீயாய் பரவி வருகிறது. களத்தில் எதிரெதிர் அணிகளாக நின்றாலும், தங்களுக்கு இடையிலான நட்பை அவர்கள் வெளிப்படுத்திய விதம் ரசிகர்களை வெகுவாகக் கவர்ந்துள்ளது.
குறும்பு
மைதானத்தில் அரங்கேறிய ஜடேஜா - குல்தீப் குறும்பு
ராஜஸ்தான் ராயல்ஸ் அணியின் இன்னிங்ஸின் போது, 12வது ஓவரில் துருவ் ஜூரெல் ஆட்டமிழந்த பிறகு ரவீந்திர ஜடேஜா பேட்டிங் செய்ய களம் புகுந்தார். அப்போது பந்துவீசத் தயாராக இருந்த டெல்லி அணியின் குல்தீப் யாதவ், ரவீந்திர ஜடேஜாவை நோக்கி வந்ததைக் கண்ட ஜடேஜா, விளையாட்டாகத் தனது பேட்டை வீசி அவரை மிரட்டுவது போல் நடித்தார். இதைக் கண்டு சற்றும் அஞ்சாத குல்தீப், ஜடேஜாவின் தோளில் கைகளைப் போட்டு அவரை லேசாகத் தள்ளினார். ஜடேஜா தனது பேட்டை நடுவரிடம் பரிசோதனை செய்யச் சென்றபோதும், குல்தீப் அவரை விடாமல் பிடித்து இழுத்துத் தள்ளியது மைதானத்தில் சிரிப்பலையை ஏற்படுத்தியது.
ட்விட்டர் அஞ்சல்
Twitter Post
OMG 😱 War between Kuldeep Yadav & Ravindra Jadeja 😭#DCvsRR #RRvsDC
— Rolex x👑 (@Tfg85743663) May 1, 2026
Kyle Jamieson #Peddi
Riyan Paragpic.twitter.com/ZZNhckDYMN
அதிரடி ஆட்டம்
பராக் மற்றும் பெரைராவின் அதிரடி ஆட்டம்
முன்னதாக பேட்டிங் செய்த ராஜஸ்தான் ராயல்ஸ் அணிக்கு ஆரம்பமே பின்னடைவாக அமைந்தது. ஜெய்ஸ்வால் மற்றும் வைபவ் சூர்யவன்ஷி சொற்ப ரன்களில் ஆட்டமிழந்தனர். ஆனால், கேப்டன் ரியான் பராக் மீண்டும் தனது ஃபார்முக்குத் திரும்பி, 50 பந்துகளில் 90 ரன்கள் குவித்து அசத்தினார். நடப்பு சீசனில் அவரது முதல் அரைசதம் இதுவாகும். இறுதியில் டொனோவன் பெரைரா வெறும் 14 பந்துகளில் 47 ரன்கள் விளாசி ராஜஸ்தான் அணி 225 ரன்கள் என்ற இமாலய இலக்கை எட்ட உதவினார். டெல்லி தரப்பில் நட்சத்திர வேகப்பந்துவீச்சாளர் மிட்செல் ஸ்டார்க் 3 விக்கெட்டுகளை வீழ்த்தி அசத்தினார்.
ராகுல் - நிசங்கா
ராகுல் - நிசங்காவின் சாதனை பார்ட்னர்ஷிப்
226 ரன்கள் என்ற கடினமான இலக்கை நோக்கித் துரத்திய டெல்லி கேபிடல்ஸ் அணிக்கு, தொடக்க வீரர்கள் கே.எல்.ராகுல் மற்றும் பதும் நிசங்கா ஆகியோர் 110 ரன்களைச் சேர்த்து வலுவான அடித்தளம் அமைத்தனர். நிசங்கா 33 பந்துகளில் 62 ரன்கள் எடுத்து அதிரடி காட்ட, மறுபுறம் கேப்டன் கே.எல்.ராகுல் 40 பந்துகளில் 75 ரன்கள் குவித்து அணியை வெற்றியை நோக்கி அழைத்துச் சென்றார். இடையில் ராஜஸ்தான் வீரர்கள் விக்கெட்டுகளை வீழ்த்தி அழுத்தம் கொடுத்த போதிலும், நிதீஷ் ராணா (33), அசுதோஷ் சர்மா (25*) மற்றும் ஸ்டப்ஸ் ஆகியோரின் பங்களிப்பால் டெல்லி அணி 5 பந்துகள் மீதமிருக்கையிலேயே வெற்றிக் கோட்டைத் தொட்டது.
வெற்றி
வெற்றிப் பாதைக்குத் திரும்பிய டெல்லி கேப்பிடல்ஸ்
தொடர்ச்சியாக மூன்று தோல்விகளைச் சந்தித்திருந்த டெல்லி அணிக்கு, இந்தப் போட்டி ஒரு மிகப்பெரிய நிம்மதியைக் கொடுத்துள்ளது. ஐபிஎல் வரலாற்றில் தங்களது அதிகபட்ச சேஸிங் சாதனையை டெல்லி அணி இதன் மூலம் முறியடித்துள்ளது. ரியான் பராக் வுப்பிங் (Vaping) சர்ச்சைக்குப் பிறகு தனது ஆட்டத்தின் மூலம் பதிலடி கொடுத்திருந்தாலும், ராஜஸ்தான் அணியின் பந்துவீச்சு பலவீனம் அந்த அணிக்கு மீண்டும் தோல்வியைப் பெற்றுத்தந்தது. சுவாரசியமான ஜடேஜா - குல்தீப் தருணங்களுடன், விறுவிறுப்பான ரன் வேட்டையையும் கண்டு ரசிகர்கள் உற்சாகமடைந்த ஒரு போட்டியாக இது அமைந்தது.