குஜராத் டைட்டன்ஸை ஒருமுறை கூட வெல்ல முடியாத சிஎஸ்கே! சரித்திரத்தை மாற்றுமா?
செய்தி முன்னோட்டம்
ஐபிஎல் 2023 சீசனின் குவாலிஃபையர் 1 இல் சென்னை சூப்பர் கிங்ஸ் மற்றும் நடப்பு சாம்பியனான குஜராத் டைட்டன்ஸ் அணிகள் செவ்வாய்க்கிழமை (மே 23) மோதுகின்றன.
இந்த போட்டியில் வெற்றி பெறும் அணி இறுதிப் போட்டிக்கு நேரடியாக தகுதி பெறும்.
போட்டி சேப்பாக்கத்தில் உள்ள எம்ஏ சிதம்பரம் ஸ்டேடியத்தில் நடப்பதால் சென்னை சூப்பர் கிங்ஸ் அணிக்கு கூடுதல் பலம் கிடைத்துள்ளது.
எனினும், ஐபிஎல் வரலாற்றில் இதுவரை இரு அணிகளும் நேருக்கு நேர் மோதிய மூன்று போட்டிகளிலும் சென்னை அணி குஜராத்திடம் தோல்வியை தழுவியுள்ளதால், இதில் வெற்றி பெறுமா என்ற கவலையும் ரசிகர்களிடையே எழுந்துள்ளது.
csk vs gt preview
12வது முறையாக பிளேஆப் போட்டியில் விளையாடும் சென்னை சூப்பர் கிங்ஸ்
ஐபிஎல் 2023இல் பிளேஆப் சுற்றுக்கு தகுதி பெற்றதன் மூலம் சென்னை சூப்பர் கிங்ஸ் 12வது முறையாக பிளேஆஃப் சுற்றுக்கு தகுதி பெற்றுள்ளது.
ஐபிஎல் 2022இல் அறிமுக அணியாக களமிறங்கிய குஜராத் டைட்டன்ஸ் இரண்டாவது முறையாக பிளேஆப் சுற்றுக்கு தகுதி பெற்றுள்ள நிலையில், கோப்பையை தக்கவைக்கும் முனைப்புடன் உள்ளது.
சென்னை அணி இதில் வெற்றி பெற்று இறுதிப்போட்டிக்கு முன்னேறினால் 10 ஐபிஎல் இறுதிப் போட்டிகளில் ஒரு அணியை வழிநடத்தும் முதல் வீரர் என்ற பெருமையை தோனி பெறுவார்.
மறுபுறம், குஜராத் இறுதிப்போட்டிக்கு முன்னேறினால், ஹர்திக் பாண்டிய ஒரு அணியை அவர்களின் முதல் இரண்டு சீசன்களில் ஐபிஎல் இறுதிப் போட்டிக்கு வழிநடத்திய முதல் வீரர் என்ற பெருமையை பெறுவார்.