INDvsENG 3வது டி20: 5 விக்கெட் எடுத்தும் மோசமான சாதனை படைத்த வருண் சக்ரவர்த்தி
செய்தி முன்னோட்டம்
வருண் சக்ரவர்த்தி இந்திய கிரிக்கெட் அணிக்கு திரும்பியது சாதாரணமானது அல்ல. தென்னாப்பிரிக்கா சுற்றுப்பயணத்தின் போது வருண் இந்திய அணிக்கு திரும்பினார்.
அங்கு இந்தியா நான்கு டி20 கிரிக்கெட் போட்டிகளில் விளையாடியது மற்றும் 12 விக்கெட்டுகளை வீழ்த்தி தென்னாப்பிரிக்க வீரர்களுக்கு சிம்ம சொப்பனமாக விளங்கினார்.
அடுத்து, தற்போது இங்கிலாந்துக்கு எதிரான டி20 கிரிக்கெட் தொடரில் அவர் தனது அற்புதமான ஆட்டத்தைத் தொடர்ந்து, இதுவரை மூன்று போட்டிகளில் 8.50 சராசரியில் 10 விக்கெட்டுகளை எடுத்தார்.
செவ்வாய்க்கிழமை (ஜனவரி 28) நடைபெற்ற மூன்றாவது டி20 கிரிக்கெட்டில் வருணின் 5-24 என்ற ஸ்பெல் அவரது இரண்டாவது 5 விக்கெட் ஸ்பெல்லாகும்.
ஆனால், இது அவரது சோகமான சாதனையாக மாறியதுதான் வேதனையே. இதுகுறித்து விரிவாக பார்க்கலாம்.
சாதனை முறியடிப்பு
குல்தீப் யாதவின் சாதனை முறியடிப்பு
நான்கு ஆண்டுகளுக்கு முன்பு இந்திய டி20 அணிக்கு தேர்ந்தெடுக்கப்பட்ட வருண் சக்ரவர்த்தி ஆறு போட்டிகளுக்குப் பிறகு நீக்கப்பட்டார்.
அவற்றில் மூன்று அந்த ஆண்டின் டி20 உலகக் கோப்பையில் வந்தன. அந்த சமயத்தில் ஆறு போட்டிகளில் 66 ரன்களை விட்டுக் கொடுத்து 2 விக்கெட்டுகளை மட்டுமே வீழ்த்தினார்.
இந்நிலையில், கடந்த அக்டோபரில் மீண்டும் வந்ததில் இருந்து, வரிசையாக அவரது 10 டி20 போட்டிகளில் 27 விக்கெட்டுகளை பெற்றுள்ளார்.
இதன்மூலம், தொடர்ச்சியாக 10 டி20 போட்டிகளில் விளையாடி அதிக விக்கெட் எடுத்த இந்தியரான குல்தீப் யாதவின் (25 விக்கெட்டுகள்) சாதனையை முறியடித்தார்.
மேலும், சர்வதேச அளவில், ரஷித் கானின் 30 மற்றும் சைசருல் இட்ரஸின் 28 விக்கெட்டுகளுக்கு பிறகு மூன்றாவது இடத்தில் உள்ளார்.
சோதனை
சாதனை சோதனையாக மாறிய தருணம்
இந்தியா vs இங்கிலாந்து இடையேயான போட்டியில் 5 விக்கெட் எடுத்ததன் மூலம், தனது இரண்டாவது 5 விக்கெட் ஸ்பெல்லை எடுத்தார்.
இதன் மூலம், சர்வதேச டி20 கிரிக்கெட்டில் 2 முறை ஐந்து விக்கெட் ஸ்பெல்லை எடுத்த குல்தீப் யாதவ் மற்றும் புவனேஷ்குமாரின் சாதனைகளை சமன் செய்துள்ளார்.
வருண் சக்ரவர்த்தி இதற்கு முன்னர் கடந்த ஆண்டு தென்னாப்பிரிக்காவிற்கு எதிரான இரண்டாவது போட்டியில் 5 விக்கெட் எடுத்த நிலையில், அந்த போட்டியில் இந்தியா தோற்றது.
இந்நிலையில், தற்போதும் இந்திய அணி தோற்றதால், 5 விக்கெட் எடுத்த இரண்டு முறையும் தனது அணி தோல்வியைச் சந்தித்த முதல் சர்வதேச கிரிக்கெட் வீரர் என்ற மோசமான சாதனையை வருண் சக்ரவர்த்தி படைத்துவிட்டார்.
இந்தியா vs இங்கிலாந்து 3வது டி20
இந்தியா vs இங்கிலாந்து 3வது டி20 ஹைலைட்ஸ்
இந்தியா vs இங்கிலாந்து இடையே ராஜ்கோட் நிரஞ்சன் ஷா மைதானத்தில் செவ்வாய்க்கிழமை நடைபெற்ற போட்டியில், டாஸ் வென்ற இந்தியா முதலில் பந்துவீச முடிவு செய்தது.
இதைத் தொடர்ந்து முதலில் பேட்டிங் செய்த இங்கிலாந்து கிரிக்கெட் அணி 20 ஓவர்களில் 9 விக்கெட் இழப்பிற்கு 171 ரன்கள் சேர்த்தது.
172 ரன்கள் இலக்குடன் களமிறங்கிய இந்திய அணியால் 20 ஓவர்களில் 9 விக்கெட் இழப்பிற்கு 145 ரன்கள் மட்டுமே எடுக்க முடிந்ததால், 26 ரன்கள் வித்தியாசத்தில் தோல்வியைத் தழுவியது.
இதன் மூலம், ஐந்து போட்டிகள் கொண்ட டி20 தொடரில் தற்போது இந்தியா 2-1 என முன்னிலை வகிக்கிறது.