இஸ்ரேல்-ஹமாஸ் மோதலால் அச்சம்; உலக கேடட் செஸ் சாம்பியன்ஷிப்பில் இருந்து இந்தியா விலகல்
பாதுகாப்பு கருதி உலக கேடட் செஸ் சாம்பியன்ஷிப்பில் இருந்து இந்திய அணி விலக முடிவு செய்துள்ளது. அக்டோபர் 14 முதல் 23 வரை எகிப்தில் உள்ள ஷர்ம் எல்-ஷேக்கில் இந்த நிகழ்ச்சி நடைபெற இருந்தது. காசாவின் நிலைமை மற்றும் பாதுகாப்பு கருதி இந்த முடிவு எடுக்கப்பட்டதாக அகில இந்திய செஸ் கூட்டமைப்பு (ஏஐசிஎஃப்) செய்திக்குறிப்பில் தெரிவித்துள்ளது. இந்த செஸ் சாம்பியன்ஷிப்பில் 12, 10 மற்றும் 8 வயதுக்குட்பட்ட பிரிவுகளுக்கு போட்டிகள் திட்டமிடப்பட்டன. முன்னதாக, போட்டிக்காக இந்திய தரப்பில் இருந்து சுமார் 80 பேர் ஷர்ம் எல்-ஷேக்கிற்கு போட்டிக்காக பயணிக்க இருந்தனர். மேலும், போட்டியை ஒத்திவைக்க உலக செஸ் அமைப்பிடம் (FIDE) இந்திய செஸ் கூட்டமைப்பு கோரிக்கை விடுத்துள்ளதாக ஏஐசிஎஃப் அதிகாரியும் உறுதிப்படுத்தினார்.
