தோனியை "தல" என பாராட்டிய பாகிஸ்தான் முன்னாள் கேப்டன் ரஷீத் லத்தீப்
ஐபிஎல் 2023 இல் சென்னை சூப்பர் கிங்ஸ் (சிஎஸ்கே) தனது முதல் வெற்றியை பதிவு செய்த நிலையில், முன்னாள் பாகிஸ்தான் கேப்டன் ரஷித் லத்தீப் எம்.எஸ்.தோனிக்கு வாழ்த்துக்களை தெரிவித்துள்ளார். இந்த சீசனில் சிஎஸ்கே இரண்டு போட்டிகளில் விளையாடி முடித்துள்ள நிலையில், தோனிக்கு அதிகமாக பேட்டிங் செய்யும் வாய்ப்பு கிடைக்கவில்லை என்றாலும், அவர் 10 பந்துகளை எதிர்கொண்டு 3 சிக்ஸர்கள் உட்பட 26 ரன்களை எடுத்துள்ளார். மேலும் தோனி ஐபிஎல்லில் 5,000 ரன்களை எட்டிய ஆறாவது இந்திய வீரர் ஆனார். தோனி 40 வயதுக்கு மேலே ஆகியும் பந்தை ஸ்டாண்டிற்குள் அடிக்கும் திறனை வெளிப்படுத்தியதால், பாகிஸ்தான் முன்னாள் கேப்டன் ரஷீத் லத்தீப் உட்பட பல முன்னாள் கிரிக்கெட் வீரர்களை அவர் கவர்ந்தார்.
பாகிஸ்தான் முன்னாள் கேப்டன் ரஷீத் லத்தீப் பேசியதன் முழு விபரம்
காட் பிகைன்ட் என்ற யூடியூப் சேனலில் நௌமன் நியாஸ் 41 வயது இளைஞன் என்று தோனியை குறிப்பிட்டு முன்னாள் பாகிஸ்தான் கேப்டன் ரஷீத் லத்தீப்பிடம் தோனி குறித்து கேள்வி எழுப்பினார். அதற்கு பதிலளித்த லத்தீப் 'தல' என்று தோனியை புகழ்ந்து பாராட்டியுள்ளார். "ஐபிஎல்லில் மட்டும் தோனி 5,000 ரன்களை அடித்துள்ளார். தோனியிடம் எப்போதும் ஒரு தங்க டெம்ப்ளேட் உள்ளது. இந்தியாவுக்காக, உலக கிரிக்கெட்டுக்காக அவரது வரலாறு தங்கத்தால் எழுதப்பட்டுள்ளது. அவர் சிறந்த இந்திய கேப்டன் மற்றும் ஒரு விக்கெட் கீப்பர் பேட்டர். அதில் எந்த சந்தேகமும் இல்லை." என்று அவர் கூறினார். மூன்று பெரிய ஐசிசி கோப்பைகளை வென்ற ஒரே கேப்டன் தோனி மட்டுமே என்பது குறிப்பிடத்தக்கது.
