வைபவ் சூர்யவன்ஷிக்கு வாய்ப்பு மறுப்பு: சஞ்சு சாம்சனுக்கு ஆதரவாக கம்பீர் அதிரடி
செய்தி முன்னோட்டம்
வெஸ்ட் இண்டீஸ் அணிக்கு எதிரான டி20 தொடரில் தொடக்க ஆட்டக்காரர்களாக சஞ்சு சாம்சன் மற்றும் அபிஷேக் சர்மா ஜோடி தொடர்ந்து களமிறக்கப்பட்டு வரும் நிலையில், இளம் அதிரடி ஆட்டக்காரரான 15 வயது வைபவ் சூர்யவன்ஷி நான்கு போட்டிகளிலும் பெஞ்சில் அமரவைக்கப்பட்டது கிரிக்கெட் வட்டாரங்களில் விவாதத்தை ஏற்படுத்தியுள்ளது. இந்நிலையில், இந்த முடிவை முழுமையாக நியாயப்படுத்தியுள்ள இந்திய அணியின் தலைமைப் பயிற்சியாளர் கவுதம் கம்பீர், சூர்யவன்ஷியை ஆடவைப்பதற்காக சஞ்சு சாம்சன் அல்லது அபிஷேக் சர்மாவை நீக்குவது முற்றிலும் நியாயமற்ற செயல் என்று திட்டவட்டமாகத் தெரிவித்துள்ளார்.
முன்னுரிமை
சஞ்சு சாம்சனின் திறமையும் கம்பீரின் முடிவும்
சஞ்சு சாம்சனின் அனுபவம் மற்றும் முந்தைய ஆட்டத்திறனைச் சுட்டிக்காட்டிய கம்பீர், "சஞ்சு சாம்சன் என்ன செய்யக்கூடியவர் என்பதை நிரூபித்துக் காட்டியுள்ளார்.
எந்தவொரு திறமையும் இல்லாமல் ஒருவர் உலகக் கோப்பையில் 'தொடர் நாயகன்' விருதை வென்றுவிட முடியாது.
கடந்த இங்கிலாந்து தொடரில் அவரை அணியிலிருந்து ஒதுக்கி வைத்ததுதான் எனது ஒட்டுமொத்தப் பயிற்சியாளர் வாழ்க்கையிலேயே நான் எடுத்த மிகக் கடுமையான முடிவு.
ஓரிரு போட்டிகளில் சரியாக ஆடவில்லை என்பதற்காக, இந்திய அணி உலகக் கோப்பையை வெல்லக் காரணமாக இருந்த மூத்த வீரர்களைத் திறமையற்றவர்கள் என்று கூறிவிட முடியாது.
தொடரை வென்ற வெற்றி ஜோடியுடன் களமிறங்குவதே அணியின் திட்டம்" என்று விளக்கமளித்தார்.
அறிவுரை
பொறுமை காக்க வேண்டும் சூர்யவன்ஷி!
அதேநேரம் 15 வயதேயான வைபவ் சூர்யவன்ஷியின் அசாத்திய திறமையை அங்கீகரித்த கம்பீர், அவர் தனக்கான வாய்ப்பு வரும் வரை பொறுமை காக்க வேண்டும் என்று அறிவுறுத்தினார். "வைபவ் சூர்யவன்ஷியின் அசாத்திய திறமை எங்களுக்கு நன்றாகத் தெரியும்.
ஆனால் பல ஆண்டுகளாகத் தொடர்ந்து சர்வதேச அளவில் சிறப்பாகச் செயல்பட்டு வரும் மூத்த வீரர்கள், புதிதாக அணிக்குள் வருபவர்களை விட முன்னுரிமை பெறுவார்கள் என்பது தெளிவான எதார்த்தம்.
அவருக்கு எப்போது வாய்ப்புக் கிடைக்கிறதோ, அப்போது நீண்ட தொடர் வாய்ப்புகள் வழங்கப்படும்" என்றார்.
இதனிடையே, தொடரை வெல்லும் தீவிரத்தில் இந்தியா களமிறங்கும் கடைசி போட்டிக்கு முன்னதாக, சமூக வலைதளத்தில் "இன்னும் நம்பிக்கையுடன் இருக்கிறேன்" என சூர்யவன்ஷி பதிவிட்டுள்ளது ரசிகர்களிடையே கவனத்தை ஈர்த்துள்ளது.