உலக டெஸ்ட் சாம்பியன்ஷிப் வரலாற்றில் அதிக தோல்வி; மோசமான சாதனை படைத்த இங்கிலாந்து கிரிக்கெட் அணி
செய்தி முன்னோட்டம்
பர்மிங்காமில் உள்ள எட்ஜ்பாஸ்டன் மைதானத்தில் இந்தியாவுக்கு எதிராக ஏற்பட்ட முதல் தோல்வியைத் தொடர்ந்து, ஐசிசி உலக டெஸ்ட் சாம்பியன்ஷிப் வரலாற்றில் அதிக தோல்விகளைப் பதிவு செய்த அணி என்ற மோசமான சாதனையை இங்கிலாந்து கிரிக்கெட் அணி படைத்துள்ளது. கேப்டன் ஷுப்மன் கில் தலைமையிலான இந்திய அணி, பேட்டிங்கிற்கு சாதகமான எட்ஜ்பாஸ்டன் மைதானத்தில் இங்கிலாந்தை வீழ்த்தி, ஐந்து போட்டிகள் கொண்ட தொடரை 1-1 என சமன் செய்தனர். ஷுப்மன் கில்லின் அசாதாரண ஃபார்ம் அவர் இரண்டு இன்னிங்ஸ்களில் 430 ரன்கள் குவிக்க உதவியது. மேலும், இதில் முதல் இன்னிங்ஸில் 269 ரன்கள் உட்பட, ஒரு டெஸ்ட் கிரிக்கெட் போட்டியில் அதிக தனிநபர் ஸ்கோரைப் பெற்ற இந்திய கேப்டன் என்ற பெருமையைப் பெற்றார்.
26வது தோல்வி
டெஸ்ட் சாம்பியன்ஷிப் வரலாற்றில் 26வது தோல்வி
இங்கிலாந்து கிரிக்கெட் அணியின் இந்தத் தோல்வி, உலக டெஸ்ட் சாம்பியன்ஷிப் வரலாற்றில் இங்கிலாந்தின் 26வது தோல்வியாகும். இதன் மூலம் உலக டெஸ்ட் சாம்பியன்ஷிப் வரலாற்றில் அதிக தோல்விகளை பெற்ற அணியாக மாறியுள்ளது. முன்னர் வெஸ்ட் இண்டீஸ் மற்றும் வங்கதேசத்துடன் இணைந்து தலா 25 தோல்விகளை பெற்றிருந்த நிலையில், மற்ற இரண்டு அணிகளை பின்னுக்குத் தள்ளி மோசமான சாதனையை படைத்துள்ளது. இங்கிலாந்தின் சமீபத்திய போராட்டங்கள், டெஸ்ட் கிரிக்கெட்டில் அவர்களின் முரண்பாட்டை எடுத்துக்காட்டுகின்றன. இதற்கிடையே, இந்தியா vs இங்கிலாந்து இடையேயான மூன்றாவது டெஸ்ட் போட்டி லார்ட்ஸ் மைதானத்தில் அடுத்து நடக்க உள்ளது.