ஐபிஎல் 2025, 2026, 2027க்கான போட்டி தேதிகள் அறிவிப்பு
முன்னெப்போதும் இல்லாத வகையில், ஐபிஎல் நிர்வாகம் அடுத்த மூன்று சீசன்களுக்கான தேதிகளை முன்கூட்டியே வெளியிட்டுள்ளது. இதன்படி ஐபிஎல் 2025 சீசன் மார்ச் 14 அன்று மே 25 அன்று வரை நடைபெற உள்ளது. மேலும் ஐபிஎல் 2026 சீசன் மார்ச் 15 முதல் மே 31 வரையிலும், ஐபிஎல் 2027 சீசன் மார்ச் 14 முதல் மே 30 வரையிலும் நடைபெறும் என கூறப்பட்டுள்ளது. ஈஎஸ்பிஎன் கிரிக்இன்போ, இதுகுறித்து வெளியிட்டுள்ள அறிக்கையில், ஐபிஎல் நிர்வாகம் கடந்த வியாழன் அன்று அனைத்து அணி உரிமையாளர்களுக்கும் அனுப்பிய தகவலில் இதை கூறியுள்ளதாகத் தெரிவித்துள்ளது. அந்த தகவலில் ஐபிஎல் போட்டித் தேதிகளை விண்டோஸ் எனக் குறிப்பிட்டிருந்தாலும், இவையே இறுதி தேதிகளாக இருக்கும் என எதிர்பார்க்கப்படுகிறது.
போட்டிகளின் எண்ணிக்கை
கடந்த மூன்று சீசன்களைப் போலவே 2025 சீசனிலும் 74 போட்டிகள் இருக்கும். இருப்பினும், 2023-27 சுழற்சிக்கான ஊடக உரிமைகள் விற்கப்பட்ட 2022 இல் ஐபிஎல் பட்டியலிட்ட 84 போட்டிகளை விட அந்த எண்ணிக்கை பத்து குறைவாகும். புதிய உரிமைச் சுழற்சிக்கான டெண்டர் ஆவணத்தில், ஐபிஎல் ஒவ்வொரு சீசனுக்கும் மாறுபட்ட எண்ணிக்கையிலான போட்டிகளை பிசிசிஐ பட்டியலிட்டுள்ளது. 2023 மற்றும் 2024 இல் தலா 74 ஆட்டங்கள், 2025 மற்றும் 2026 இல் தலா 84 போட்டிகள் மற்றும் ஒப்பந்தம் முடியும் இறுதி ஆண்டான 2027 இல் அதிகபட்சமாக 94 ஆட்டங்கள் இருக்கும் என கூறியிருந்தது குறிப்பிடத்தக்கது.
