WTA ஃபைனல்ஸ் 2026: கரோலினா முச்சோவாவை வீழ்த்தி வெற்றியுடன் கணக்கை தொடங்கினார் அரினா சபலென்கா
செய்தி முன்னோட்டம்
நடப்பு ஆண்டின் மகளிர் டென்னிஸ் சீசனை நிறைவு செய்யும் மதிப்புமிக்க டபிள்யூடிஏ ஃபைனல்ஸ் தொடரில், உலகின் முன்னாள் நம்பர் 1 வீராங்கனையான அரினா சபலென்கா தனது முதல் ஆட்டத்திலேயே நேரடி செட்களில் அபார வெற்றி பெற்றுள்ளார். அமெரிக்காவின் இண்டியன் வெல்ஸ் நகரில் நடைபெற்ற இப்போட்டியில், செக் குடியரசின் வலுவான வீராங்கனையான கரோலினா முச்சோவாவை எதிர்கொண்ட இரண்டாம் நிலை வீராங்கனை சபலென்கா, சுமார் இரண்டு மணி நேரம் நீடித்த கடுமையான போராட்டத்திற்குப் பிறகு 7-6 (7/2), 7-5 என்ற செட் கணக்கில் நேர்த்தியாக வென்றார்.
டைபிரேக்கர் சுற்று
சபலென்காவின் மீண்டு வரும் வியூகம்
போட்டியின் முதல் செட்டில் ஒரு கட்டத்தில் தனது சர்வை இழந்து 4-5 எனப் பின்தங்கிய சபலென்கா, உடனடியாக சுதாரித்து முச்சோவாவின் சர்வை முறியடித்து ஆட்டத்தை 5-5 எனச் சமன் செய்தார்.
பின்னர் நடைபெற்ற டைபிரேக்கரில் ஆதிக்கம் செலுத்தி 7-2 என்ற புள்ளிக் கணக்கில் முதல் செட்டைக் கைப்பற்றினார். இரண்டாவது செட்டிலும் இரு வீராங்கனைகளுக்கும் இடையே கடும் சவாலான சர்வ் பிரேக்குகள் நீடித்தன.
ஆட்டத்தை முடிக்கும் வாய்ப்பில் 5-4 என முன்னிலையிலிருந்தபோது தனது சர்வை இழந்த போதிலும், உடனடியாக மீண்டு வந்து அடுத்த கேமை வென்று 7-5 என இரண்டாவது செட்டையும் தனதாக்கி வெற்றியை உறுதிசெய்தார்.
அடுத்தகட்ட மோதல்:
மீரா ஆண்ட்ரீவாவின் வெற்றி
இத்தொடரின் மற்றொரு குரூப் ஆட்டத்தில், பிரெஞ்ச் ஓபன் சாம்பியனான 19 வயது இளம் வீராங்கனை மீரா ஆண்ட்ரீவா, உக்ரைனின் எலினா ஸ்விடோலினாவை 6-4, 6-0 என்ற நேர் செட்களில் எளிதில் வீழ்த்தி தனது அறிமுகப் போட்டியை மறக்கமுடியாத வெற்றியாக மாற்றினார்.
குறிப்பாக இரண்டாவது செட்டில் முழு ஆதிக்கம் செலுத்தி ஸ்விடோலினாவை ஒரு கேம் கூட வெல்ல விடாமல் அவர் அசத்தினார்.
இதையடுத்து வரும் புதன்கிழமை நடைபெறவுள்ள அடுத்த லீக் சுற்றில் அரினா சபலென்கா மற்றும் மீரா ஆண்ட்ரீவா ஆகியோர் நேருக்கு நேர் மோதவுள்ளனர்.