ஜப்பானை வீழ்த்தி பிரேசில் த்ரில் வெற்றி; 88 ஆண்டுகால வரலாற்றுச் சாதனையை முறியடித்த மார்டினெல்லி
செய்தி முன்னோட்டம்
அமெரிக்காவின் ஹூஸ்டன் நகரில் உள்ள என்ஆர்ஜி (NRG) மைதானத்தில் திங்கட்கிழமை நடைபெற்ற 2026 ஃபிஃபா உலகக்கோப்பை கால்பந்து தொடரின் ரவுண்ட் ஆப் 32 தகுதிச் சுற்று ஆட்டத்தில், ஐந்து முறை சாம்பியனான பிரேசில் அணி, ஜப்பானை எதிர்கொண்டது. சுமார் 68,777 ரசிகர்கள் முன்னிலையில் நடைபெற்ற இந்த விறுவிறுப்பான ஆட்டத்தில், பலத்த போராட்டத்திற்கு பிறகு பிரேசில் அணி 2-1 என்ற கோல் கணக்கில் த்ரில் கம்பேக் வெற்றி பெற்று அடுத்த சுற்றுக்கு முன்னேறியுள்ளது. இந்த வெற்றியின் மூலம், உலகக்கோப்பையின் நாக்-அவுட் சுற்றில் முதல் பாதியில் பின்தங்கியிருந்த போதிலும், இரண்டாவது பாதியில் மீண்டெழுந்து பிரேசில் அணி வெற்றி பெறுவது கடந்த 88 ஆண்டுகளில் இதுவே முதல் முறையாகும்.
மார்டினெல்லி
மார்டினெல்லியின் கடைசி நிமிட வரலாற்று கோல்
போட்டியின் முதல் பாதியில் ஜப்பான் அணி 1-0 என முன்னிலை பெற்று பிரேசிலுக்கு அதிர்ச்சி அளித்தது. இரண்டாவது பாதியில் ஆட்டத்தின் 56-வது நிமிடத்தில் பிரேசிலின் கேசமிரோ ஒரு அதிரடி கோல் அடித்து ஆட்டத்தை சமன் செய்தார். ஆட்டத்தின் கூடுதல் நேரத்தில், அர்செனல் அணியின் நட்சத்திர முன்கள வீரர் கேப்ரியல் மார்டினெல்லி மாற்று ஆட்டக்காரராக களம் புகுந்து, போட்டியின் 95-வது நிமிடத்தில் (90+5′) பிரேசில் அணிக்கான வரலாற்று வெற்றி கோலை அடித்தார். உலகக்கோப்பை நாக்-அவுட் வரலாற்றிலேயே, சாதாரண ஆட்ட நேரத்தின் கடைசி நிமிடத்தில் அடிக்கப்பட்ட மிகத் தாமதமான வெற்றி கோல் இதுவாகும்.
சாதனை
88 ஆண்டுகால சோகத்திற்கு முற்றுப்புள்ளி
இதற்கு முன்பு பிரேசில் அணி, உலகக்கோப்பை நாக்-அவுட் போட்டியில் முதல் பாதியில் பின்தங்கி, பின்னர் இரண்டாவது பாதியில் வென்றது 1938-ஆம் ஆண்டு செக்கோஸ்லோவாக்கியாவுக்கு எதிரான போட்டியில் மட்டுமே ஆகும். அதன் பிறகு கடந்த 88 ஆண்டுகளில், முதல் பாதியில் பின்தங்கியிருந்த 4 முக்கிய நாக்-அவுட் போட்டிகளிலும் பிரேசில் தொடர் தோல்விகளையே சந்தித்திருந்தது. ஜப்பான் அணிக்கு எதிராகத் தங்களின் மோசமான வரலாற்றுச் சாபத்தை முறியடித்துள்ள பிரேசில் அணியின் இந்த அசாத்திய கம்பேக், நடப்பு 2026 உலகக்கோப்பைத் தொடரில் மற்ற அணிகளுக்கு ஒரு பலத்த எச்சரிக்கையாக அமைந்துள்ளது.